മട്ടാഞ്ചേരി (കൊച്ചി): പെര്‍മിറ്റില്ലാതെ കേരള തീരത്ത് മത്സ്യബന്ധനം നടത്തിയ ബോട്ടുകള്‍ ഫിഷറീസ് വകുപ്പ് പിടിച്ചെടുത്തു. ഗുജറാത്ത് ബോട്ടായ ഹെവന്‍, ലക്ഷദ്വീപ് ബോട്ട് തേര എന്നിവയാണ് കോസ്റ്റല്‍ പോലിസ് പിടികൂടിയത്. തുടര്‍ന്ന് ബോട്ടുകളെ വൈപ്പിന്‍ ഫിഷറീസ് വകുപ്പിന് കൈമാറി. അനധികൃത മത്സ്യബന്ധനം നടത്തിയതിന് തേര ബോട്ടിന് തൊണ്ണൂറായിരം രൂപ പിഴയീടാക്കുകയും ഇരുപതിനായിരം രൂപ പെര്‍മിറ്റിനായി ഈടാക്കുകയും ചെയ്തു.
എന്നാല്‍ കേരളത്തിലെ മത്സ്യബന്ധന ബോട്ടുകള്‍ക്ക് അനുവദിച്ച കളര്‍ കോഡ് ഗുജറാത്ത് ബോട്ട് ഉപയോഗിച്ചുവെന്ന കാരണത്താല്‍ ബോട്ടിലെ മത്സ്യം കാളമുക്ക് ഫിഷറീസ് ഹാര്‍ബറില്‍ വച്ച് ലേലം ചെയ്യുകയായിരുന്നു. തുടര്‍ നടപടികള്‍ ഇന്ന് സ്വീകരിക്കുമെന്ന് ഫിഷറീസ് അസി.ഡയറക്ടര്‍ അനീഷ് പറഞ്ഞു. അതേസമയം, ഫിഷറീസ് വകുപ്പിന്റെ നടപടിക്കെതിരെ പ്രതിഷേധവുമായി കൊച്ചി ഫിഷറീസ് ഹാര്‍ബര്‍ ഗില്‍നെറ്റ് ആന്‍ഡ് ലോങ് ലൈന്‍ ബയിങ് ഏജന്റ്‌സ് അസോസിയേഷന്‍ രംഗത്തെത്തി.
സാധാരണ ഇത്തരം നടപടികളില്‍ പിഴ ഈടാക്കി വിടാമെന്നിരിക്കെ ലക്ഷങ്ങള്‍ വിലമതിക്കുന്ന മത്സ്യം കുറഞ്ഞവിലയില്‍ ലേലം ചെയ്യുന്ന നടപടി ഒത്തുകളിയുടെ ഭാഗമാണെന്നാണ് ആക്ഷേപമുയര്‍ന്നിട്ടുള്ളത്. ആഴ്ചകള്‍ കടലില്‍ കിടന്ന് വരുന്നവരെ ദ്രോഹിക്കുന്ന നടപടിയാണ് ഫിഷറീസ് വകുപ്പിന്റേതെന്നും ഗില്‍നെറ്റ് ബോട്ടുകള്‍ കൊച്ചി ഫിഷറീസ് ഹാര്‍ബറില്‍ എത്തുന്നത് തടയാനുള്ള അധികൃതരുടെ ഗൂഢ നീക്കത്തിന്റെ ഭാഗമാണിതെന്ന് സംശയിക്കുന്നതായും കൊച്ചി ഫിഷറീസ് ഹാര്‍ബര്‍ ഗില്‍നെറ്റ് ആന്‍ഡ് ലോങ് ലയിങ് ബയിങ് ഏജന്റ്‌സ് അസോസിയേഷന്‍ പ്രസിഡന്റ് എ. എം. നൗഷാദ് ആരോപിച്ചു.
പ്രതികരിക്കാൻ ഇവിടെ എഴുതുക: