തിരുവനന്തപുരം : സംസ്ഥാനത്തെ സാമ്പത്തിക കുറ്റകൃത്യങ്ങളുടെ എണ്ണം ഉയരുന്ന സാഹചര്യത്തില് ഇതിനായി പ്രത്യേക സംഘം രൂപീകരിക്കാന് തീരുമാനം. ചതി, സാമ്പത്തിക തട്ടിപ്പുകള്, പണമിടപാടുകള്, വിശ്വാസവഞ്ചന, വ്യാജരേഖ ചമയ്ക്കല് എന്നിങ്ങനെയുള്ള സാമ്പത്തിക കുറ്റകൃത്യങ്ങള് അന്വേഷിക്കുന്നതിനാണ് ഈ പ്രത്യേക സമിതിയെ രൂപീകരിക്കുന്നത്.
ഇന്ന് ചേര്ന്ന നിയമസഭാ യോഗത്തിലാണ് സാമ്പത്തിക കുറ്റകൃത്യങ്ങള് അന്വേഷിക്കുന്നതിനായി പോലീസില് പ്രത്യേക സംഘം രൂപീകരിക്കാന് ആവശ്യപ്പെട്ടിരിക്കുന്നത്. ക്രൈംബ്രാഞ്ചിന്റെ കീഴില് രൂപീകരിക്കുന്ന ഈ വിഭാഗത്തിന് 233 തസ്തികകള് സൃഷ്ടിക്കാനും നിര്ദ്ദേശം നല്കിയിട്ടുണ്ട്.
226 എക്സിക്യൂട്ടീവ് തസ്തികകളും ഏഴ് മിനിസ്റ്റീരിയല് തസ്തികകളുമാണ് സൃഷ്ടിക്കുക. ഒരു ഐജി., നാല് എസ്പി, 11 ഡിവൈഎസ്പി, 19 ഇന്സ്പെക്ടര്മാര്, 29 എസ്ഐമാര്, 73 വീതം എസ് സിപിഒ, സിപിഒ, 16 ഡ്രൈവര്മാര് എന്നിങ്ങനെയാണ് എക്സിക്യൂട്ടീവ് തസ്തികകള്.
അതേസമയം സംസ്ഥാന പോലീസുകാര്ക്കെതിരെയുള്ള പരാതികളുടെ എണ്ണം വര്ധിച്ചതോടെ പോലീസിന്റെ കുറ്റകൃത്യം അന്വേഷിക്കാന് പുതിയ ഏജന്സി രൂപീരിക്കാന് സംസ്ഥാന സര്ക്കാരിന് ശുപാര്ശ ചെയ്തു. ഇതുസംബന്ധിച്ച് പ്രത്യേകസമിതിയുടെ റിപ്പോര്ട്ട് സര്ക്കാരിന് സമര്പ്പിച്ചു. ചീഫ്സെക്രട്ടറി അധ്യക്ഷനും ആഭ്യന്തര സെക്രട്ടറി അംഗവുമായ സമിതിയാണ് പോലീസുകാരുടെ കുറ്റങ്ങള് അന്വേഷിക്കാന് പുതിയ ഏജന്സി വേണമെന്ന നിര്ദേശം സമര്പ്പിച്ചത്.
