തൃശൂര്: നഗ്നചിത്രങ്ങള് പ്രചരിപ്പിച്ചെന്ന ഇന്തോനേഷ്യന് യുവതിയുടെ പരാതിയില് സുഹൃത്തായ തൃശൂര് തളിക്കുളം സ്വദേശി പിടിയില്. തളിക്കുളം ഇടശേരി പുതിയവീട്ടില് ഹസനെ (29) യാണ് സൈബര് പൊലീസ് അറസ്റ്റ് ചെയ്തത്. ദുബായില് ആയിരുന്ന പ്രതി തളിക്കുളം ഇടശേരി പുതിയവീട്ടില് ഹസന് (29) നെടുമ്ബാശേരി വിമാനത്താവളത്തില് ഇറങ്ങിയതിനു തൊട്ടുപിന്നാലെയാണ് അറസ്റ്റ്.
സൈബര് ക്രൈം ഇന്സ്പെക്ടര് പികെ പത്മരാജനും സംഘവുമാണ് പ്രതിയെ പിടികൂടിയത്. ഇന്തോനേഷ്യയിൽ നിന്നും ഇ-മെയില് വഴി ഡിജിപിക്ക് ലഭിച്ച പരാതിയിലാണ് അറസ്റ്റ്. അധ്യാപികയായ യുവതിയും ഹസനും സൗഹൃദത്തിലായിരുന്നു. ഇവരുമായി അകന്നതിനു ശേഷം ഹസന് യുവതിയുടെ പേരില് ഫെയ്സ്ബുക്കില് വ്യാജ പ്രൊഫൈലുണ്ടാക്കി നഗ്നചിത്രങ്ങളും വിഡിയോകളും എഡിറ്റ് ചെയ്ത് അക്കൗണ്ട് വഴി പ്രചരിപ്പിച്ചു എന്നാണ് യുവതി നല്കിയ പരാതി.
യുവതിയുടെ വീട്ടുകാര്ക്കും സുഹൃത്തുക്കള്ക്കും ഹസന് ദൃശ്യങ്ങള് അയച്ചുനല്കി. ഇതോടെ യുവതി 2019ല് ഡിജിപിക്ക് പരാതി നല്കി. പ്രതിക്കെതിരെ റൂറല് പോലീസ് മേധാവി ഐശ്വര്യ ഡോംഗ്രെ ലുക്ക് ഔട്ട് നോട്ടിസ് പുറത്തിറക്കിയിരുന്നു. എസ്ഐമാരായ ടി.എം. കശ്യപന്, ഗോപികുമാര്, എഎസ്ഐ തോമസ്, സിപിഒമാരായ അനൂപ്, ഷനൂഹ്, കെ. ഹസീബ് എന്നിവരടങ്ങിയ സംഘമാണ് പ്രതിയെ പിടികൂടിയത്.
