പത്തനംതിട്ട: ശബരിമല സന്നിധാനത്ത് പത്തുദിവസത്തെ ഉത്സവത്തിന് കൊടിയേറി. ഇന്നലെ രാവിലെ 10.30നും 11.30 നും മദ്ധ്യേയുള്ള മുഹൂര്‍ത്തത്തില്‍ തന്ത്രി കണ്ഠര് മഹേഷ് മോഹനരുടെ മുഖ്യകാര്‍മ്മികത്വത്തിലായിരുന്നു കൊടിയേറ്റ്.
പുലര്‍ച്ചെ 5ന് ക്ഷേത്ര തിരുനട തുറന്ന നിര്‍മ്മാല്യവും പതിവ് അഭിഷേകവും മഹാഗണപതി ഹോമവും നടത്തിയശേഷം ഉഷപൂജ കഴിഞ്ഞ് ബിംബ ശുദ്ധി ക്രിയയും കലശാഭിഷേകവും നടന്നു. രാവിലെ 10ന് കൊടിക്കൂറ പൂജയും കൊടിമര പൂജയും കൊടിയേറ്റ് പൂജയും നടന്നു. അതിനു ശേഷമായിരുന്നു കൊടിയേറ്റ്. കൊടിയേറ്റിനു ശേഷം കൊടിമര ചുവട്ടില്‍ ദീപാരാധന നടന്നു. 25 കലശാഭിഷേകത്തിന് ശേഷമായിരുന്നു ഉച്ചപൂജ.
എണ്ണം നിയന്ത്രിക്കാതെ ഭക്തരെ കടത്തി വിടും
കൊച്ചി: ശബരിമലയില്‍ മീനമാസ പൂജയ്‌ക്കും ഉത്സവത്തിനും ദിനംപ്രതിയുള്ള എണ്ണം നിയന്ത്രിക്കാതെ ഭക്തരെ കടത്തി വിടുമെന്ന് സര്‍ക്കാര്‍ ഹൈക്കോടതിയില്‍ അറിയിച്ചു. നിലവില്‍ പ്രതിദിനം 15,000 ഭക്തര്‍ക്ക് പ്രവേശനം എന്ന വ്യവസ്ഥയാണ് മാറ്റുന്നത്.
കൊവിഡ് വ്യാപനത്തില്‍ കുറവു വന്ന സാഹചര്യത്തില്‍ ഭക്തരുടെ എണ്ണത്തില്‍ ഏര്‍പ്പെടുത്തിയ നിയന്ത്രണം നീക്കണമെന്നാവശ്യപ്പെട്ട് ശബരിമല സ്‌പെഷല്‍ കമ്മിഷണര്‍ ഹൈക്കോടതിക്ക് റിപ്പോര്‍ട്ട് നല്‍കിയിരുന്നു. തുടര്‍ന്നാണ് ഇത്തരമൊരു തീരുമാനം സംസ്ഥാന ദുരന്ത നിവാരണ അഥോറിറ്റി എടുത്തതായി സര്‍ക്കാര്‍ വിശദീകരിച്ചത്. ജസ്റ്റിസ് അനില്‍. കെ. നരേന്ദ്രന്‍, ജസ്റ്റിസ് പി.ജി. അജിത് കുമാര്‍ എന്നിവര്‍ ഉള്‍പ്പെട്ട ഡിവിഷന്‍ ബെഞ്ച് ഈ വിശദീകരണം രേഖപ്പെടുത്തി ഹര്‍ജി തീര്‍പ്പാക്കി. മീനമാസ പൂജയ്‌ക്കായി മാര്‍ച്ച് 19 വരെയാണ് നട തുറന്നിരിക്കുന്നത്.
പ്രതികരിക്കാൻ ഇവിടെ എഴുതുക: