കൊച്ചി : നടിയെ ആക്രമിച്ച കേസില് അന്വേഷണം പൂര്ത്തിയാക്കാന് മൂന്ന് മാസം കൂടി വേണ്ടി വരുമെന്ന് ക്രൈംബ്രാഞ്ച്. കേസിന്റെ അന്വേഷണ റിപ്പോര്ട്ട് ഹൈക്കോടതിയില് സമര്പ്പിക്കവേയാണ് ഇക്കാര്യം കോടതിയില് അറിയിച്ചത്. സിനിമാ മേഖലയില് നിന്നുള്പ്പടെ നിരവധി പേരെ ചോദ്യം ചെയ്യേണ്ടതുണ്ട്. അതിനാല് മൂന്ന് മാസം അധിക സമയം അനുവദിച്ച് നല്കണമെന്നും ക്രൈംബ്രാഞ്ച് കോടതിയില് ആവശ്യപ്പെട്ടു.
ബാലചന്ദ്ര കുമാറിന്റെ വെളിപ്പെടുത്തലുകളുടെ അടിസ്ഥാനത്തിലാണ് ക്രൈംബ്രാഞ്ച് വീണ്ടും അന്വേഷണം ആരംഭിച്ചത്. തുടരന്വേഷണത്തിനായി കോടതി പ്രത്യേക സംഘത്തിന് നല്കിയ ഒരുമാസത്തെ സമയപരിധി അടുത്തിടെ അവസാനിച്ചിരുന്നു. ഇതോടെയാണ് അന്വേഷണം പൂര്ത്തിയായിട്ടില്ലെന്നും മൂന്ന് മാസം കൂടുതല് ആവശ്യപ്പെട്ടിരിക്കുന്നത്. നടിയെ ആക്രമിച്ച കേസിന്റെ വിചാരണ പൂര്ത്തിയാക്കാന് ആറ് മാസത്തെ സമയം കൂടി വിചാരണക്കോടതി സുപ്രീംകോടതിയോടും ആവശ്യപ്പെട്ടിട്ടുണ്ട്.
നേരത്തെ നടിയെ ആക്രമിച്ച കേസില് തുടരന്വേഷണം റദ്ദാക്കണമെന്നാവശ്യപ്പെട്ട് ദിലീപ് നല്കിയ ഹര്ജി ഹൈക്കോടതി വിധി പറയാന് മാറ്റിയിരുന്നു. അന്വേഷണത്തിലെ പാളിച്ചകള് മറച്ച് വെക്കാനാണ് ഇപ്പോഴത്തെ തുടരന്വേഷണമെന്നും പോലീസ് തനിക്കെതിരെ വ്യാജ തെളിവുകള് ഉണ്ടാക്കുകയാണെന്നുമായിരുന്നു ദിലീപ് നേരത്തെ അറിയിച്ചത്.
