ന്യൂദല്ഹി: കോണ്ഗ്രസ് നേതാവ് ഗുലാം നബി ആസാദിന്റെ മരുമകന് മുബാഷിര് ആസാദ് ജമ്മു കശ്മീരില് ബിജെപിയില് ചേര്ന്നു. ജമ്മു കശ്മീരിലെ സജീവ കോണ്ഗ്രസ് പ്രവര്ത്തകനായിരുന്നു മുബാഷിര് ആസാദ്.
ജമ്മുവിലെ ബിജെപി ആസ്ഥാനത്ത് നടന്ന ചടങ്ങിലാണ് മുബാഷിര് ആസാദിന്റെ ബിജെപി പ്രവേശം നടന്നത്. കേന്ദ്രഭരണപ്രദേശമായ ജമ്മു കശ്മീരില് മുബാഷിര് ആസാദിന്റെ വരവ് ബിജെപി പ്രവര്ത്തകര്ക്ക് പ്രചോദനമാകുമെന്ന് ജമ്മു കശ്മീര് ബിജെപി പ്രസിഡന്റ് രവീന്ദര് റെയ്ന പറഞ്ഞു. ഗുലാം നബി ആസാദിന്റെ ഇളയ സഹോദരന് ലിയാഖത് അലി ഭട്ടിന്റെ മകനാണ് മുബാഷിര് അസാദ്. ജമ്മു കശ്മീരില് ഈ വര്ഷം തെരഞ്ഞെടുപ്പ് നടക്കുന്ന റിപ്പോര്ട്ടിന്റെ അടിസ്ഥാനത്തിലാണ് മുബാഷിര് ആസാദിന്റെ ബിജെപി പ്രവേശം.
ഈയിടെ നിരവധി നേതാക്കള് ബിജെപിയില് ചേര്ന്നിരുന്നു. ജമ്മു കശ്മീരിലെ നാഷണല് കോണ്ഫറന്സ് നേതാവ് ദേവേന്ദ്ര സിങ് റാണയും സുര്ജിത് സിങ്ങ് സലാതിയയും ഉള്പ്പെടെ 12 പേര് ബിജെപിയില് ചേര്ന്നിരുന്നു. ജമ്മു കശ്മീരിലെ ജനങ്ങളെ ദേശീയ താല്പര്യത്തിന്റെ അടിസ്ഥാനത്തില് ബിജെപി മുന്നോട്ട് നയിക്കുമെന്ന് ജമ്മു കശ്മീര് ബിജെപി അധ്യക്ഷന് രവീന്ദര് റെയ്ന പറഞ്ഞു.
