വെഞ്ഞാറമൂട്: വെമ്പായം ജംഗ്ഷനില്‍ പെയിന്റ് കടയില്‍ തീപിടുത്തം. വെമ്പായം ജംഗ്ഷനിലെ എ എന്‍ പെയിന്റ് കടയ്‌ക്കാണ് തീ പിടിച്ചത്. കന്യാകുളങ്ങര സ്വദേശിയായ നിസാമുദ്ദീന്റെ ഉടമസ്ഥതയിലുള്ള കടയ്‌ക്കാണ് തീ പിടിച്ചത്.
ഇന്നലെ രാത്രി 7.30 തോടെ ആണ് തീ പിടിച്ചത്. കടയ്‌ക്കുള്ളില്‍ ചെറിയ തീ ഉണ്ടാകുന്നത് കണ്ടപ്പോള്‍ തന്നെ ജീവനക്കാര്‍ ഇറങ്ങി ഓടുകയായിരുന്നു. അതിനാല്‍ ആളപായം ഉണ്ടായില്ല. തീ പടര്‍ന്നപ്പോള്‍ തന്നെ തൊട്ടടുത്ത കടയിലെ ജീവനക്കാര്‍ തീ അണയ്‌ക്കാന്‍ ശ്രമം നടത്തി. തൊട്ടടുത്ത ഹൈപ്പര്‍ മാര്‍ക്കറ്റില്‍ നിന്നും അഗ്‌നിരക്ഷാ ഉപകരണങ്ങള്‍ ഉപയോഗിച്ച് തീ അണയ്‌ക്കാന്‍ ശ്രമിച്ചെങ്കിലും പെയിന്റിന് തീ പിടിച്ചതിനാല്‍ ശ്രമം വിഫലമായി. പോലീസും ഫയര്‍ഫോഴ്‌സും സ്ഥലത്ത് എത്തിയെങ്കിലും തീ നിയന്ത്രണവിധേയമാക്കാന്‍ കഴിഞ്ഞില്ല. അഞ്ച് നില കെട്ടിടം പൂര്‍ണമായും കത്തിനശിച്ചു.
തൊട്ടടുത്ത കടയിലേക്ക് തീ പടരുന്ന സ്ഥിതി ഉണ്ടായി. ഇതിനിടയില്‍ അഞ്ചുനിലകളുള്ള കെട്ടിടത്തിന്റെ ഗ്ലാസുകള്‍ പൊട്ടിത്തെറിക്കാന്‍ തുടങ്ങിയതോടെ നാട്ടുകാര്‍ പരിഭ്രാന്തരായി. പോലീസിനും നിയന്ത്രിക്കാന്‍ കഴിയാത്ത സ്ഥിതിയായി. വെഞ്ഞാറമൂട് നിന്നും നെടുമങ്ങാട്, ചാക്ക, കടയ്‌ക്കല്‍, ആറ്റിങ്ങല്‍, ചെങ്കല്‍ചൂള എന്നിവിടങ്ങളില്‍ നിന്നും 20 ഓളം ഫയര്‍ഫോഴ്‌സ് വാഹനങ്ങള്‍ എത്തിയാണ് മറ്റു കടകളിലേക്ക് തീ പടരുന്നത് തടഞ്ഞത്. അപകടസാധ്യത കണക്കിലെടുത്ത് എം സി റോഡ് വഴിയുള്ള ഗതാഗതം പൂര്‍ണമായും പോലീസ് തടഞ്ഞു.
രാത്രി പത്തുമണിയോടെയാണ് തീ നിയന്ത്രണവിധേയമാക്കിയത്. ഭക്ഷ്യമന്ത്രി ജി.ആര്‍. അനില്‍, കളക്ടര്‍ ഡോ. നവജ്യോത് ഖോസ, ഉന്നത പോലീസുദ്യോഗസ്ഥര്‍ എന്നിവര്‍ സ്ഥലം സന്ദര്‍ശിച്ചു. അടുത്തകാലത്താണ് എ എന്‍ പെയിന്റ്‌സ് വെമ്പായത്ത് പ്രവര്‍ത്തനം ആരംഭിച്ചത്. തീ പിടിത്തത്തിന്റെ കാരണം വ്യക്തമല്ല.
പ്രതികരിക്കാൻ ഇവിടെ എഴുതുക: