മോസ്കോ : ഉക്രൈനില് നിന്നും റഷ്യന് സൈന്യത്തെ പിന്വലിക്കണമെന്ന് ആവശ്യപ്പെട്ടുള്ള യുഎന് രക്ഷാ സമിതി പ്രമേയത്തെ വീറ്റോ ചെയ്ത് റഷ്യ. ഇതോടെ പ്രമേയം പൊതു സഭയിലെത്തും. 11 രാജ്യങ്ങള് രക്ഷാ സമിതി പ്രമേയത്തെ അനുകൂലിച്ചു. എന്നാല് ഇന്ത്യയും ചൈനയും ഇതില് നിന്നും വിട്ട നിന്നു.
സ്ഥിരാംഗം വീറ്റോ ചെയ്തതോടെ പ്രമേയം യുഎന് പൊതു സഭയില് കൊണ്ടുവരുമെന്ന് അമേരിക്ക അറിയിച്ചു. എന്നാല് ഇരു രാജ്യങ്ങളും തമ്മിലുള്ള പ്രശ്നം പരിഹാരം കാണണമെന്ന് ഇന്ത്യ യുഎന്നില് ആവശ്യപ്പെട്ടു. നയതന്ത്ര ചര്ച്ചയിലൂടെയാണ് പ്രശ്നം പരിഹരിക്കേണ്ടതെന്നും മനുഷ്യക്കുരുതിയില്ലാതാക്കാകണം. പ്രമേയത്തില് നിന്ന് വിട്ടു നിന്നത് സമാധാന നീക്കങ്ങള്ക്ക് ഇടം കൊടുക്കാനാണെന്നും ഇന്ത്യന് പ്രതിനിധി ടി.എസ്. തിരുമൂര്ത്തി വിശദീകരിച്ചു. എന്നാല് റഷ്യക്ക് എതിരായ പ്രമേയത്തില് ചൈനയുടെ പിന്മാറ്റം അപ്രതീക്ഷിതമായിരുന്നു. ഇനി 192 അംഗ പൊതു സഭയില് ഇനി വിഷയമെത്തും. ചര്ച്ചയുടെ വഴിയിലേക്ക് ഇരുപക്ഷവുമെത്തുമെന്ന് പ്രതീക്ഷിക്കുന്നുവെന്നും ഇന്ത്യ യുഎന്നില് പ്രതീക്ഷ പ്രകടിപ്പിച്ചു.
ഉക്രൈനിലെ റഷ്യന് ആക്രമണം ഇപ്പോഴും തുടരുകയാണ്. അഞ്ച് സ്ഫോടനങ്ങളാണ് ഇന്ന് നടന്നത്. ഒഡേസ തുറമുഖത്ത് റഷ്യ നടത്തിയ ആക്രമണത്തില് രണ്ട് ചരക്ക് കപ്പലുകള് തകര്ന്നതായാണ് വിവരം. ഒഡേസ തുറമുഖത്തെ മാള്ഡോവ, പനാമ കപ്പലുകളാണ് തകര്ത്തത്. മെട്രോ സ്റ്റേഷനില് നടന്ന സ്ഫോടനത്തില് സ്റ്റേഷന് തകര്ന്നു. ഉക്രൈന് മേല് റഷ്യ ആക്രമണങ്ങള് കടുപ്പിച്ചതോടെ സ്വകാര്യ റഷ്യന് വിമാനങ്ങള്ക്ക് ബ്രിട്ടന് വ്യോമപാത നിരോധിച്ചു. ഉക്രൈന് തിരിച്ചടിച്ചതായുള്ള വാര്ത്തകളും പുറത്തുവരുന്നുണ്ട്. റഷ്യന് വിമാനം വെടിവെച്ചിട്ടെന്നാണ് ഉക്രൈന് അവകാശപ്പെടുന്നത്.
അതേസമയം ഉക്രൈന് തലസ്ഥാനമായ കീവില് തന്നെയുണ്ടെന്ന് പ്രസിഡന്റ് വ്ളാദിമിര് സെലന്സ്കി. നേരത്തെ പ്രസിഡന്റ് ബങ്കറിലേക്ക് മാറി എന്ന വാര്ത്ത വന്നതിന് പിന്നാലെ കീവിലെ പ്രസിഡന്റ് ഓഫീസിന് മുന്നില് നിന്നും സംസാരിക്കുന്ന വീഡിയോ അദ്ദേഹം പുറത്തുവിടുകയായിരുന്നു. ഉക്രൈന് ജനതയ്ക്ക് എന്നപേരിലാണ് പ്രസിഡന്റ് സെലന്സ്കിയുടെ വീഡിയോ സന്ദേശം പുറത്തുവന്നിരിക്കുന്നത്. ‘രാജ്യം വിട്ട് പോകില്ല അവസാനം വരെ പോരാടും’ വീഡിയോ സന്ദേശത്തില് പ്രസിഡന്റ് പറയുന്നു. പ്രസിഡന്റിനൊപ്പം ഉക്രൈന് ആഭ്യന്തര പ്രതിരോധ മന്ത്രിമാരും ഉണ്ടായിരുന്നു.
അമേരിക്കന് പ്രസിഡന്റ് ജോ ബൈഡനുമായി വ്ളാദിമിര് സെലന്സ്കി ചര്ച്ച നടത്തി. ഇരു നേതാക്കളും 40 മിനുട്ടോളം ഫോണില് സംസാരിച്ചുവെന്നും റിപ്പോര്ട്ട് പുറത്തുവന്നിട്ടുണ്ട്. അമേരിക്കയോട് ചര്ച്ച വേളയില് യുക്രൈന് പ്രസിഡന്റ് വീണ്ടും സൈനിക സഹായം ആവശ്യപ്പെട്ടുവെന്നാണ് റിപ്പോര്ട്ട്. റഷ്യയെ സമ്മര്ദ്ദത്തിലാക്കാന് കൂടുതല് ഉപരോധം ആവശ്യമാണെന്നും സെലന്സ്കി പറഞ്ഞു.
നേരത്തെ റഷ്യ ചര്ച്ചയ്ക്ക് തയ്യാറാകണമെന്നാവശ്യപ്പെട്ട് ഉക്രൈന് പ്രസിഡന്റ് സെലന്സ്കി രംഗത്തെത്തിയിരുന്നു. ചര്ച്ചകള് വേഗം ആരംഭിച്ചാല് നാശനഷ്ടം കുറയുമെന്നും ആക്രമണം അവസാനിക്കുന്നത് വരെ പ്രതിരോധം തുടരുമെന്നും എന്ത് സംഭവിച്ചാലും രാജ്യം വിടില്ലെന്നും വ്ളാദിമിര് സെലന്സ്കി നിലപാട് വ്യക്തമാക്കിയിരുന്നു.
