കാഞ്ഞാണി: റോഡരുകിലെ പറമ്പിൽ നിന്ന് ഓടി വന്ന പശുവിന്റെ ഇടിയേറ്റ് സ്കൂട്ടർ മറിഞ്ഞ് യാത്രക്കാരായ അമ്മക്കും മകൾക്കും പരിക്കേറ്റു. അന്തിക്കാട് സ്വദേശികളായ മങ്ങന്തറ റിജി പ്രേമദാസൻ(44), മകൾ സയന (18) എന്നിവർക്കാണ് പരിക്കേറ്റത്. ഇതുമായി ബന്ധപെട്ട് പശുവിന്റെ ഉടമ മണലൂർ സ്വദേശി വാലപറമ്പിൽ സുനിൽ കുമാറിനെതിരെ അന്തിക്കാട് പോലീസ് കേസെടുത്തു.
കഴിഞ്ഞ ദിവസം വൈകീട്ടാണ് സംഭവം. പാന്തോടിലെ വീട്ടിൽ നിന്ന് കാഞ്ഞാണിയിലേക്ക് മകളെ ട്യൂഷന് കൊണ്ടുവിടുന്നതിനായി സ്കൂട്ടറിൽ വരുന്നതിനിടയിൽ കനാൽ പാലത്തിന് സമീപം സുനിൽ കുമാറിന്റെ മരമില്ലിൽനിന്ന് പാഞ്ഞെത്തിയ പശു റോഡിന് കുറുകെ ചാടി ഇവർ സഞ്ചരിച്ചിരുന്ന സ്ക്കൂട്ടറിൽ ഇടിച്ചാണ് അപകടമുണ്ടായത്. ഇടിയുടെ ആഘാതത്തിൽ സ്കൂട്ടറിൽ നിന്ന് ഇരുവരും റോഡിലേക്ക് തെറിച്ചു വീഴുകയായിരുന്നു. കാലുകൾ കുത്തിയുള്ള വീഴ്ചയിൽ ഇരുവരുടെയും കാലിന്റെ ലിഗമെൻ്റുകൾക്ക് കേട്പാടുകൾ സംഭവിച്ചതിനാൽ സ്വകാര്യ ആശുപത്രിയിൽ ചികിത്സ തേടുകയും കാലുകളിൽ പ്ലാസ്റ്ററിടുകയും ചെയ്തു.
ഇരുവരോടും മൂന്നാഴ്ച പൂർണ്ണ വിശ്രമമെടുക്കാനാണ് ഡോക്ടർ നിർദ്ദേശിച്ചിട്ടുള്ളത്.അപകട സമയത്ത് ഇത് വഴിമറ്റ് വാഹനങ്ങളൊന്നും കടന്ന് വരാതിരുന്നത് വലിയ ദുരന്തത്തിൽ നിന്നാണ് ഇവരെ രക്ഷപെടുത്തിയതെന്നാണ് നാട്ടുകാർ പറയുന്നത്.
