ന്യൂദല്ഹി : വാഹനമോടിക്കുമ്പോള് ഫോണില് സംസാരിക്കുന്നത് ഇന്ത്യയില് ഉടന് നിയമവിധേയമാകുമെന്ന് കേന്ദ്ര ഗതാഗത മന്ത്രി നിതിന് ഗഡ്കരി. ഹാന്ഡ്സ് ഫ്രീ ഉപകരണവുമായി ഫോണ് കണക്ട് ചെയ്ത് നിബന്ധനകളോടെ ഇത് ഉപയോഗിക്കാമെന്നാണ് കേന്ദ്രമന്ത്രി അറിയിച്ചത്.
വാഹനമോടിക്കുമ്പോള് ഫോണ് പോക്കറ്റില് ഉണ്ടായിരിക്കണം. ഇതുമായി ബന്ധപ്പെട്ട് കൊണ്ടുവരുന്ന നിയമം കര്ശ്ശനമായി പാലിക്കേണ്ടതാണ്. ഉടന് ഇത് നിയമവിധേയമാക്കുമെന്നും നിതിന് ഗഡ്കരി ലോക്സഭയില് അറിയിച്ചു. ട്രാഫിക് പോലീസ് ഇതുമായി ബന്ധപ്പെട്ട് ചുമത്തുന്ന നടപടികളെ കോടതിയില് ചോദ്യം ചെയ്യാമെന്നും അദ്ദേഹം പറഞ്ഞു.
കാറുകളില് മുന്നിലേക്ക് തിരിഞ്ഞിട്ടുള്ള ത്രീ പോയിന്റ് സീറ്റ് ബെല്റ്റ് നിര്ബന്ധമായും നല്കിയിരിക്കണമെന്ന് വാഹന നിര്മാതാക്കള്ക്ക് കഴിഞ്ഞ ദിവസം കേന്ദ്ര സര്ക്കാര് നിര്ദേശം നല്കിയിരുന്നു. കാറിന്റെ പിന്നിരയിലെ മധ്യഭാഗത്തെ സീറ്റിനും ഈ മാനദണ്ഡം ബാധകമാകും. എന്നാല് ഇതുസംബന്ധിച്ച പുതിയ നിബന്ധന എന്നാണ് നിലവില് വരുന്നതെന്ന് വ്യക്തമാക്കിയിട്ടില്ല. നിലവില് മിക്ക കാറുകളിലും മുന് സീറ്റുകളിലും രണ്ട് പിന് സീറ്റുകളിലും മാത്രമാണ് ത്രീ പോയിന്റ് സീറ്റ് ബെല്റ്റുകള് ഉള്ളത്.
ഈ വര്ഷം ഒക്ടോബര് മുതല് യാത്രക്കാരുടെ സുരക്ഷ വര്ധിപ്പിക്കുന്നതിനായി എട്ട് യാത്രക്കാര്ക്ക് സഞ്ചരിക്കാവുന്ന മോട്ടോര് വാഹനങ്ങളില് കുറഞ്ഞത് ആറ് എയര്ബാഗുകളെങ്കിലും നല്കണമെന്ന് കാര് നിര്മാതാക്കളോട് പറയുമെന്ന് ഗതാഗത മന്ത്രാലയം കഴിഞ്ഞ മാസം വ്യക്തമാക്കിയിരുന്നു.
