കൊല്ക്കത്ത: ഭരണഘടനയിലെ സവിശേഷാധികാരം ഉപയോഗിച്ച് സംസ്ഥാന നിയമസഭ നിര്ത്തിവച്ച് പശ്ചിമബംഗാള് ഗവര്ണര് ജഗ്ദീപ് ധന്കര്. രാജ്ഭവനും മമത ബാനര്ജി സര്ക്കാറും തമ്മിലുള്ള ശീതസമരം തുടരുന്നതിനിടെയാണ് രാജ്ഭവന്റെ അപ്രതീക്ഷിത നീക്കം. ഫെബ്രുവരി 12 മുതല് അടിയന്തര പ്രാധാന്യത്തോടെ സഭ നിര്ത്തിവയ്ക്കുന്നു എന്നാണ് രാജ്ഭവന് പുറത്തിറക്കിയ വാര്ത്താകുറിപ്പിലുള്ളത്.
ഗവര്ണറുടെ ഭരണഘടനാ അധികാരങ്ങളെ കുറിച്ചുള്ള ചര്ച്ചകള്ക്ക് വഴിയൊരുക്കുന്നതാണ് ധന്കറിന്റെ നടപടി. ഭരണഘടനയുടെ 174ാം വകുപ്പിന് കീഴിലുള്ള രണ്ടാം വ്യവസ്ഥയിലെ എ സബ് ക്ലോസ് പ്രകാരമാണ് ഗവര്ണറുടെ ഉത്തരവ്. ബജറ്റ് സെഷനു തൊട്ടുമുമ്പാണ് ഗവര്ണറുടെ തീരുമാനം. ഫെബ്രുവരി അവസാന വാരമോ മാര്ച്ച് ആദ്യവാരമോ ആണ് ബജറ്റ് സെഷന് നടക്കുന്നത്. വരുന്ന സമ്മേളനത്തില് ഗവര്ണര്ക്കെതിരെ പ്രമേയം കൊണ്ടുവരുമെന്ന് നേരത്തെ പാര്ലമെന്റ് വകുപ്പു മന്ത്രി പാര്ത്ഥ ചാറ്റര്ജി അറിയിച്ചിരുന്നു. ധന്കറെ ഗവര്ണര് സ്ഥാനത്തു നീക്കണമെന്ന് ആവശ്യപ്പെട്ട് ടിഎംസി എംപി സുകേന്ദു ശേഖര് റായ് കഴിഞ്ഞ ദിവസം രാജ്യസഭയില് പ്രമേയവും കൊണ്ടുവന്നിരുന്നു. രാഷ്ട്രപതി ഗവര്ണറെ നീക്കാന് ഇടപെടണം എന്നായിരുന്നു ആവശ്യം. രാഷ്ട്രീയപ്രേരിതവും അപ്രതീക്ഷിതവുമാണ് ഗവര്ണറുടെ തീരുമാനമെന്ന് തൃണമൂല് നേതൃത്വം പ്രതികരിച്ചു.
നിലവില് സഭ നിര്ത്തിവച്ചതിനാല് സര്ക്കാറിന് നിയമപരമായി ബജറ്റ് അവതരിപ്പിക്കാനുള്ള സാഹചര്യം ഇല്ലാതായിട്ടുണ്ട്. സര്ക്കാര് പ്രവര്ത്തനങ്ങളെ ഇത് ദോഷമായി ബാധിക്കുമെന്നാണ് വിദഗ്ധര് ചൂണ്ടിക്കാട്ടുന്നത്. ഗവര്ണര് കളി തുടങ്ങി (ഖേലാ ഹോബെ) എന്ന അര്ത്ഥത്തിലും രാജ്ഭവന്റെ തീരുമാനം വ്യാഖ്യാനിക്കപ്പെടുന്നുണ്ട്. കഴിഞ്ഞ തെരഞ്ഞെടുപ്പില് മുഖ്യമന്ത്രി മമത ബാനര്ജിയുടെ പ്രചാരണ മുദ്രാവാക്യമായിരുന്നു ഖേലാ ഹോബെ.
