താനെ- ദിവ റെയില്‍വേ സ്റ്റേഷനുകള്‍ക്കിടയില്‍ അറ്റകുറ്റപ്പണി; കേരളത്തിലേക്ക് അടക്കമുള്ള ട്രയിനുകളുടെ ഗതാഗതം അഞ്ച് ദിവസത്തേയ്‌ക്ക് തടസ്സപ്പെടും

മുംബൈ : താനെ- ദിവ സ്റ്റേഷനുകള്‍ക്കിടയിലെ അഞ്ച്, ആറ് ലൈനുകള്‍ അറ്റകുറ്റപ്പണിക്കായി അടച്ചിടുന്നതിനാല്‍ ഇതുവഴിയുള്ള ട്രെയിന്‍ ഗതാഗതം അഞ്ച് ദിവസത്തേയ്‌ക്ക് തടസ്സപ്പെടും. ശനിയാഴ്ച മുതല്‍ തിങ്കളാഴ്ച വരെയുള്ള സര്‍വീസുകളേയാണ് ഇത് ബാധിക്കുക. കേരളത്തിലേക്കുള്ള സര്‍വീസുകളും ഇതില്‍ ഉള്‍പ്പെടും. ഇതിനോടൊപ്പം 52 ദീര്‍ഘദൂര വണ്ടികളുടെ സര്‍വീസും റദ്ദാക്കി.  

എല്‍ടിടി- കൊച്ചുവേളി എക്സ്പ്രസ്, എല്‍ടിടി- എറണാകുളം തുരന്തോ എക്സ്പ്രസ് എന്നിവയും റദ്ദാക്കിയവയില്‍പ്പെടും. നേത്രാവതി എക്സ്പ്രസ് പനവേല്‍വരെ മാത്രമേ ഓടുകയുള്ളൂ. ഇവിടെനിന്നു തന്നെ പുറപ്പെടും. സിഎസ്ടി, ദാദര്‍, എല്‍ടിടി എന്നിവിടങ്ങളില്‍നിന്ന് പുനെ, കര്‍മാലി, മഡ്ഗാവ്, ഹുബ്ലി, നാഗ്പുര്‍, നാന്ദഡ് എന്നിവിടങ്ങളിലേക്ക് ഓടുന്ന ദീര്‍ഘ ദൂരവണ്ടികളും റദ്ദാക്കിയവയില്‍പ്പെടും. ദിവ- രത്നഗിരി, ദിവ- സാവന്ത്വാഡി പാസഞ്ചര്‍ വണ്ടികളും റദ്ദാക്കിയിട്ടുണ്ട്.

കൊങ്കണ്‍ പാതയിലൂടെ ഓടുന്ന പല വണ്ടികളും പനവേലില്‍ യാത്ര അവസാനിപ്പിക്കും. ഈ വണ്ടികള്‍ ഇവിടെനിന്നു തന്നെയാവും പുറപ്പെടുക. ഹൈദരാബാദ്- സിഎസ്ടി എക്സ്പ്രസ്(17032) ഫെബ്രുവരി നാല്, അഞ്ച് തീയതികളില്‍ പൂനെയില്‍ യാത്ര അവസാനിപ്പിക്കും.  

ഈ ദിവസങ്ങളില്‍ സിഎസ്ടി, ദാദര്‍, എല്‍ടിടി സ്റ്റേഷനുകളില്‍ നിന്നും കല്യാണ്‍ ഭാഗത്തേയ്‌ക്ക് ഓടുന്ന ട്രെയിനുകള്‍ ലോക്കല്‍ ട്രെയിനിന്റെ പാളത്തിലൂടെയായിരിക്കും സഞ്ചരിക്കുക. അതിനാല്‍ താനെയില്‍ ഈ വണ്ടികള്‍ക്ക് തത്കാലം സ്റ്റോപ്പ് ഉണ്ടായിരിക്കില്ല.

ഇവിടെനിന്നും കയറേണ്ട യാത്രക്കാര്‍ ദാദറിലോ കല്യാണിലോ എത്തി വണ്ടിയില്‍ കയറേണ്ടതാണെന്നും റെയില്‍വേ അറിയിച്ചു. കൊങ്കണ്‍ പാതയിലൂടെ പോകേണ്ടവര്‍ പനവേലില്‍ എത്തേണ്ടതാണ്. ദിവ- വസായ് റോഡ്- പനവേല്‍ മെമു സര്‍വീസും റദ്ദാക്കിയ വണ്ടികളുടെ പട്ടികയില്‍ ഉള്‍പ്പെടും.

റദ്ദാക്കിയ തീവണ്ടികള്‍

എല്‍ടിടി- കൊച്ചുവേളി(22113)ഫെബ്രുവരി അഞ്ച്.

കൊച്ചുവേളി- എല്‍ടിടി(22114) ഫെബ്രുവരി ഏഴ്

എറണാകുളം- എല്‍ടിടി തുരന്തോ(12224) ഫെബ്രുവരി ആറ്

എല്‍ടിടി- എറണാകുളം തുരന്തോ(12223)ഫെബ്രുവരി അഞ്ച്, എട്ട്

സിഎസ്ടി- മംഗളൂരു(12133) ഫെബ്രുവരി നാല്, അഞ്ച്, ആറ്, ഏഴ്

മംഗളൂരു- സിഎസ്ടി(12134) ഫെബ്രുവരി നാല്, അഞ്ച്, ആറ്, ഏഴ്

പനവേലില്‍ സര്‍വീസ് അവസാനിപ്പിക്കുന്നവ

കൊച്ചുവേളി- എല്‍ടിടി ഗരീബ്രഥ് (12202) ഫെബ്രുവരി ആറ്

തിരുവനന്തപുരം- എല്‍ടിടി നേത്രാവതി(16346)ഫെബ്രുവരി മൂന്ന്, നാല്, അഞ്ച്, ആറ്

മംഗളൂരു- എല്‍ടിടി(12620) ഫെബ്രുവരി നാല്, അഞ്ച്, ആറ്

പനവേലില്‍നിന്ന് യാത്ര ആരംഭിക്കുന്ന ട്രെയിനുകള്‍

എല്‍ടിടി- കൊച്ചുവേളി ഗരീബ്രഥ്(12201) ഫെബ്രുവരി ഏഴ്

എല്‍ടിടി- തിരുവനന്തപുരം നേത്രാവതി(16345)ഫെബ്രുവരി അഞ്ച്, ആറ്, ഏഴ്, എട്ട്

എല്‍ടിടി- മംഗളൂരു(12619) ഫെബ്രുവരി നാല്, അഞ്ച്, ആറ്