തിരുവനന്തപുരം: കെ-റെയിലിന് അനുമതി നല്കേണ്ടതില്ലെന്ന കേന്ദ്രസര്ക്കാര് തീരുമാനം സ്വാഗതാര്ഹമാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. കെ-റെയില് എന്നത് മുഖ്യമന്ത്രി പിണറായി വിജയന്റെ ദിവാസ്വപ്നം മാത്രമായി അവശേഷിക്കുമെന്നും അദ്ദേഹം പറഞ്ഞു.
ഒട്ടും ലാഭകരമല്ലാത്ത പാരിസ്ഥിതിക്ക് വിഘാതമായ അശാസ്ത്രീയവും അഴിമതി മാത്രം ലക്ഷ്യമിട്ടുള്ളതുമായ പദ്ധതി നടപ്പാക്കാരുതെന്നാണ് ബിജെപിയുടെയും ജനങ്ങളുടെയും നലപാട്. മോദി സര്ക്കാര് കേരളത്തിലെ ജനങ്ങളുടെ താത്പര്യങ്ങള് സംരക്ഷിക്കുന്ന സര്ക്കാരാണെന്ന് വീണ്ടും തെളിയിച്ചിരിക്കുകയാണ്. കെ-റെയിലുമായി മുമ്പോട്ട് പോകാനുള്ള തീരുമാനത്തില് നിന്നും ഇനിയെങ്കിലും ഇടത് സര്ക്കാര് പിന്തിരിയണം. ഭൂമി ഏറ്റെടുക്കലിലില് നിന്നും സര്വ്വെ നടപടികളില്നിന്നും സര്ക്കാര് പിന്മാറണം. പൊലീസിന്റെ സഹായത്തോടെ ജനങ്ങളെ ഭയപ്പെടുത്തി സര്വ്വെ കല്ലുകള് സ്ഥാപിക്കുന്നത് പിണറായി സര്ക്കാര് തുടരുകയാണ്. ഇത് ഉടന് അവസാനിപ്പിക്കണം. ഇനി കെ-റെയില് പദ്ധതി നടപ്പാകില്ലെന്ന് പിണറായി തിരിച്ചറിയണം. യഥാര്ത്ഥ ഡിപിആറാണ് തയ്യാറാക്കുന്നതെങ്കിലും പദ്ധതിക്ക് കേന്ദ്ര അനുമതി ലഭിക്കില്ല. വന്ദേഭാരത് എക്സ്പ്രസുകള് കേരളത്തിന് കൂടുതല് ലഭിക്കാനുള്ള കാര്യങ്ങളാണ് മുഖ്യമന്ത്രി ചെയ്യേണ്ടത്. ഇതിന് വേണ്ടി റെയില്വെ മന്ത്രിയോട് സംസാരിക്കാന് പിണറായി തയ്യാറാകണം. കേരളത്തിന്റെ ആവശ്യങ്ങള് പരിഗണിക്കണമെന്ന് ബിജെപി റെയില്വെ മന്ത്രിയോട് അഭ്യര്ത്ഥിക്കുമെന്നും സുരേന്ദ്രന് പറഞ്ഞു.
