ശ്രീനഗര്‍ : ജമ്മു കശ്മീരില്‍ രണ്ട് സ്ഥലങ്ങളിലായി നടന്ന ഏറ്റുമുട്ടലില്‍ അഞ്ച് ഭീകരരെ വധിച്ച് സൈന്യം. പുല്‍വാമയിലും ബഡ്ഗാമിലുമാണ് ഏറ്റുമുട്ടല്‍ ഉണ്ടായത്. ജെയ്ഷ ഇ മുഹമ്മദ്, ലഷ്‌കര്‍ ഇ തോയ്ബ ഭീകരരെയാണ് വധിച്ചത്. കൊല്ലപ്പെട്ട ഭീകരരില്‍ ജെയ്‌ഷെ മുഹമ്മദ് കമാന്‍ഡര്‍ സാഹിദ് വാനിയും പാക്കിസ്ഥാന്‍ സ്വദേശിയായ ഒരു ഭീകരനും ഉള്‍പ്പെടുന്നു. ഇവരില്‍ നിന്ന് ആയുധങ്ങളും കണ്ടെടുത്തിട്ടുണ്ട്.
നാല് ഭീകരര്‍ കൊല്ലപ്പെട്ടത് പുല്‍വാമയിലെ നൈര പ്രദേശത്ത് നടന്ന ഏറ്റുമുട്ടലിലാണ്. സംഭവത്തില്‍ ഭീകരരുടെ പക്കല്‍ നിന്നും നിരവധി ആയുധങ്ങളും സ്ഫോടകവസ്തുക്കളും കണ്ടെടുത്തിട്ടുണ്ട്.
മറ്റൊരു ഏറ്റുമുട്ടല്‍ നടന്നത് ബുഡ്ഗാമിലെ ക്രാരി-ഷരീഫ് ഏരിയയിലാണ്. ഇവിടെ സുരക്ഷാസേനയും ഭീകരരും തമ്മിലുള്ള ഏറ്റുമുട്ടലില്‍ ഒരു ഭീകരന്‍ കൊല്ലപ്പെട്ടു. ഇയാളുടെ പക്കല്‍ നിന്നും എകെ 56 റൈഫിള്‍ ഉള്‍പ്പെടെയുള്ള ആയുധങ്ങള്‍ പോലീസ് കണ്ടെടുത്തു.
ഏറ്റുമുട്ടല്‍ നടന്ന ബുഡ്ഗാമിലും പുല്‍വാമയിലും തിരച്ചില്‍ തുടരുകയാണ്. സൈന്യത്തിന്റെ വലിയ വിജയമാണ് ഇതെന്ന് കശ്മീര്‍ ഐജി വിജയകുമാര്‍ പ്രതികരിച്ചു.
പ്രതികരിക്കാൻ ഇവിടെ എഴുതുക: