തിരുവനന്തപുരം: സ്റ്റുഡന്റ് പോലീസ് കേഡറ്റ് ( STUDENT POLICE CADET) അംഗങ്ങള്ക്കുള്ള യൂണീഫോമില് ഹിജാബുള്പ്പടെയുള്ള മത വേഷങ്ങള് അനുവദിക്കാത്ത തീരുമാനം മൗലികാവകാശങ്ങളുടെ ലംഘനമാണെന്ന് എം.എസ്.എഫ് മുന് ദേശീയ വൈസ് പ്രസിഡന്റ് ഫാത്തിമ തഹ്ലിയ. മതപരമായ വസ്ത്രം അനുവദിക്കപ്പെട്ട ഒരുപാട് സേനകള് ഇന്ത്യയിലുണ്ട് എന്നിരിക്കെ എസ്.പി.സി കേഡറ്റിന് തലയും കൈയ്യും മറച്ചുള്ള യൂണിഫോം അനുവദിക്കില്ല എന്ന സര്ക്കാര് തീരുമാനം മൗലിക അവകാശങ്ങളുടെ ലംഘനമാണ്.
മതപരമായ വസ്ത്രം സേനയുടെ മതേതര സ്വഭാവം നശിപ്പിക്കുമെന്ന സര്ക്കാര് വാദം ബാലിശമാണെന്നും അവര് ആരോപിച്ചു. അതേസമയം, ആഭ്യന്തര വകുപ്പിന്റെ ഉത്തരവ് അംഗീകരിക്കാനാവില്ലെന്ന് വനിതാ ലീഗ് പ്രസിഡന്റ് സുഹ്റ മമ്പാട് വ്യക്തമാക്കിയിട്ടുണ്ട് സര്ക്കാരിന്റെ നിലപാട് വൈവിധ്യങ്ങളെ ഉള്ക്കൊള്ളുന്ന ഇന്ത്യന് മതേതരത്വത്തിന്റെ അന്തഃസത്തയ്ക്ക് വിരുദ്ധമാണ്. ഗ്രേസ് മാര്ക്കും മറ്റും ലഭിക്കുന്ന സ്റ്റുഡന്റ് പോലീസില് മതപരമായ വേഷങ്ങള് അനുവദിക്കാത്തത് മൗലികാവകാശത്തിന്റെ ലംഘനമാണെന്നും അവര് പറഞ്ഞിരുന്നു.
ഫാത്തിമ തഹ്ലിയയുടെ ഫേസ്ബുക്ക് കുറിപ്പിന്റെ പൂര്ണരൂപം:
മതപരമായ വസ്ത്രം അനുവദിക്കപ്പെട്ട ഒരുപാട് സേനകള് ഇന്ത്യയിലുണ്ട് എന്നിരിക്കെ എസ്.പി.സി കേഡറ്റിന് തലയും കൈയ്യും മറച്ചുള്ള യൂണിഫോം അനുവദിക്കില്ല എന്ന സര്ക്കാര് തീരുമാനം മൗലിക അവകാശങ്ങളുടെ ലംഘനമാണ്. മതപരമായ വസ്ത്രം സേനയുടെ മതേതര സ്വഭാവം നശിപ്പിക്കുമെന്ന സര്ക്കാര് വാദം ബാലിശമാണ്.
ഇന്ത്യന് ആര്മിയില് മതപരമായ വസ്ത്രം ധരിക്കുന്ന ധാരാളം സിഖ് സൈനികരുണ്ട്. സിഖ് റെജിമെന്റ് എന്ന പേരില് ഒരു റെജിമെന്റ് തന്നെയുണ്ട് ഇന്ത്യന് ആര്മിയില്. മതപരമായ വസ്ത്രം ധരിക്കമെന്ന് ആഗ്രഹിക്കുന്ന പെണ്കുട്ടികള്ക്ക് ഗ്രേസ് മാര്ക്ക് ലഭിക്കുന്ന എസ്.പി.സിയില് പ്രവര്ത്തിക്കാന് പറ്റാതെ വരുന്നത് ജനാധിപത്യ രാജ്യത്ത് ഭൂഷണമല്ല.
