തിരുവനന്തപുരം: സംസ്ഥാനത്ത് രേഖപ്പെടുത്തിയ കൊവിഡ് കേസുകളില് 94 ശതമാനവും ഒമിക്രോണ് മൂലമെന്ന് ആരോഗ്യമന്ത്രി വീണാ ജോര്ജ്. ഒമിക്രോണുപുറമെ ആറുശതമാനം ഡെല്റ്റ വകഭേദവും കണ്ടെത്തിയിട്ടുണ്ടെന്നും മന്ത്രി വ്യക്തമാക്കി. രോഗികളുടെ 3.6 ശതമാനം മത്രമാണ് ആശുപത്രികളില് എത്തുന്നത്.
അതേസമയം ഐസിയു ഉപയോഗിക്കേണ്ടി വരുന്ന രോഗികളുടെ എണ്ണത്തില് രണ്ടുശതമാനം കുറവുണ്ട്. വെന്റിലേറ്റര് ഉപയോഗത്തിലും കുറവുണ്ടെന്നും മന്ത്രി വ്യക്തമാക്കി. ഗൃഹപരിചരണത്തിലുള്ള രോഗികളെ മൂന്നായി തിരിക്കും. സാധാരണലക്ഷണമുള്ളവര് ആരോഗ്യവകുപ്പിനെ അറിയിക്കണം. മൂന്നുദിവസത്തിനുള്ളില് ലക്ഷണങ്ങളില് കുറവില്ലെങ്കില് ആശുപത്രിചികിത്സ തേടണം. ഗുരുതര രോഗമുള്ളവരും ആശുപത്രി സേവനം തേടണമെന്നും സര്ക്കാര് അറിയിച്ചു.
സ്വകാര്യ ആശുപത്രികള് ഉള്പ്പെടെ ചികിത്സ നിഷേധിക്കരുത്. സൗകര്യമുണ്ടായിട്ടും ചികിത്സ നല്കിയില്ലെങ്കില് ഗൗരവമായി എടുക്കും. വരും ദിവസങ്ങളില് രോഗികളുടെ എണ്ണം കൂടും. രോഗികള് കൂടുന്നതനുസരിച്ച് ആശുപത്രികളിലെ ചികിത്സാ സംവിധാനങ്ങളും കൂട്ടും. അതിന് ആരോഗ്യവകുപ്പ് സജ്ജമാണെന്നും മന്ത്രി പറഞ്ഞു.
