കൊച്ചി : മോഫിയ പര്‍വീണ്‍ ആത്മഹത്യാ കേസില്‍ ആലുവ സിഐ സി.എല്‍, സുധീറിനെ കുറ്റപത്രത്തില്‍ നിന്നും ഒഴിവാക്കിയതിനെതിരെ അച്ഛന്‍ ദില്‍ഷാദ്. മകളുടെ ആത്മഹത്യയ്‌ക്ക് സിഐയും കാരണക്കാരനാണ്. മോഫിയയുടെ ആത്മഹത്യാ കുറിപ്പില്‍ ഇക്കാര്യം പരാമര്‍ശിക്കുന്നുണ്ട്. കേസില്‍ സിഐയെ പ്രതിചേര്‍ത്തില്ലെങ്കില്‍ കോടതിയെ സമീപിക്കാനാണ് തീരുമാനമെന്നും ദില്‍ഷദ് അറിയിച്ചു.
മോഫിയ പര്‍വീണിന്റെ ആത്മഹത്യാ കുറിപ്പില്‍ ആലുവ സിഐയുടെ പെരുമാറ്റത്തെ കുറിച്ച് പ്രാമര്‍ശിച്ചിരുന്നു. എന്നാല്‍ കേടസ് നടപടിക്രമങ്ങളില്‍ നിന്നും ഇയാളെ ബോധപൂര്‍വ്വം ഒഴിവാക്കുന്ന നടപടിയാണ് പോലീസിന്റെ ഭാഗത്തു നിന്നും ഇപ്പോള്‍ ഉണ്ടായിരിക്കുന്നത്. സിഐക്കെതിരെ വകുപ്പ് തല നടപടി മാത്രം പോരാ. തന്റെ മകള്‍ ആത്മഹത്യ ചെയ്തതിന് പിന്നില്‍ സിഐയ്‌ക്കും പങ്കുണ്ടെന്നും മോഫിയയുടെ അച്ഛന്‍ അറിയ്ച്ചു.
മോഫിയയുടെ ആത്മഹത്യയുമായി ബന്ധപ്പെട്ട് ചൊവ്വാഴ്ചയാണ് പോലീസ് കുറ്റപത്രം സമര്‍പ്പിച്ചത്. മോഫിയയുടെ ഭര്‍ത്താവ് സുഹൈല്‍, ഉമ്മ റുഖിയ, പിതാവ് യൂസഫ് എന്നിവരാണ് പ്രതികള്‍. സുഹൈലിന്റെ ജാമ്യാപേക്ഷ ജനുവരി 21ന് പരിഗണിക്കാനിരിക്കെയാണ് പോലീസ് ആലുവ ഫസ്റ്റ് ക്ലാസ് ജുഡീഷ്യല്‍ മജിസ്‌ട്രേറ്റ് കോടതിയില്‍ കുറ്റപത്രം സമര്‍പ്പിച്ചത്. സുഹൈലിന്റെ വീട്ടില്‍ അനുഭവിച്ച ക്രൂര പീഡനമാണ് ആത്മഹത്യക്കിടയാക്കിയെതെന്ന് കുറ്റപത്രത്തില്‍ പ്രതിപാദിക്കുന്നുണ്ട്.
സുഹൈലും മാതാപിതാക്കളും ചേര്‍ന്ന് മോഫിയയെ ക്രൂരമായി മര്‍ദ്ദിച്ചുവെന്നാണ് കുറ്റപത്രത്തില്‍ പറയുന്നത്. ലൈംഗിക വെകൃതങ്ങള്‍ക്കടക്കം സുഹൈല്‍ ഭാര്യയെ ഇരയാക്കി. മോഫിയയുടെ തലകൊണ്ട് മതിലിലിടിച്ചടക്കം അമ്മ റുഖിയ നിരന്തരം മര്‍ദ്ദിച്ചു. പിതാവ് യൂസഫ് മര്‍ദ്ദനങ്ങള്‍ കണ്ടിട്ടും മൗനം പാലിച്ചു. മോഫിയയുടെ മാതാപിതാക്കളടക്കം ഇടപെട്ടിട്ടും മര്‍ദ്ദനം തുടര്‍ന്നു. ഇന്ത്യന്‍ ശിക്ഷാ നിയമത്തിലെ ആത്മഹത്യ പ്രേരണകുറ്റം, കൊലപാതക ശ്രമം, ഗാര്‍ഹിക പീഡനം തുടങ്ങി നിരവധി വകുപ്പുകള്‍ ചേര്‍ത്താണ് അന്വേഷണ ഉദ്യോഗസ്ഥനായ റൂറല്‍ ക്രൈംബ്രാഞ്ച് ഡിവൈഎസ്പി രാജീവ് കുറ്റപത്രം സമര്‍പ്പിച്ചിരിക്കുന്നത്.
അതേസമയം കഴിഞ്ഞ നവംബര്‍ 23നാണ് മോഫിയ വീട്ടിനുള്ളില്‍ ആത്മഹത്യചെയ്യുന്നത്. സുഹൈലിന്റെ പീഡനത്തെകുറിച്ചുള്ള മോഫിയയുടെ പരാതിയില്‍ പോലീസിനുണ്ടായ വീഴ്‌ച്ചയെകുറിച്ച് ഇപ്പോഴും അന്വേഷണം പുരോഗമിക്കുകയാണ്. കേസില്‍ സുഹൈലിന്റെ മാതാപിതാക്കള്‍ നിലവില്‍ ജാമ്യത്തിലാണ്.
പ്രതികരിക്കാൻ ഇവിടെ എഴുതുക: