ഇടുക്കി : എഞ്ചിനീയറിങ് കോളേജ് വിദ്യാര്ത്ഥിയായ ധീരജിനെ കുത്തിക്കൊന്ന കേസിലെ ഒരു പ്രതികൂടി അറസ്റ്റില്. കഞ്ഞിക്കുഴി പഞ്ചായത്ത് അംഗം സോയ്മോന് സണ്ണി ആണ് പിടിയില് ആയത്. യൂത്ത് കോണ്ഗ്രസ് ജില്ലാ ജനറല് സെക്രട്ടറിയുമാണ് സോയ് മോന് സണ്ണി. ചെലച്ചുവട്ടിലെ ഇയാളുടെ വീട്ടില് നിന്നും പോലീസ് ഇയാളെ അറസ്റ്റ് ചെയ്യുകയായിരുന്നു.
ധീരജ് വധക്കേസില് ഇതുവരെ ഏഴ് പേരാണ് അറസ്റ്റിലായത്. ഈ മാസം 10നാണ് കോളജ് യൂണിയന് തെരഞ്ഞെടുപ്പിനിടെയുണ്ടായ സംഘര്ഷത്തില് എസ്എഫ്ഐ യൂണിറ്റ് കമ്മിറ്റി അംഗവും കണ്ണൂര് തളിപ്പറമ്പ് സ്വദേശിയും കംപ്യൂട്ടര് സയന്സ് വിദ്യാര്ത്ഥിയുമായ ധീരജ് രാജേന്ദ്രന് കുത്തേറ്റു മരിച്ചത്. ആക്രമണത്തില് തൃശൂര് സ്വദേശി അഭിജിത് ടി.സുനില്, കൊല്ലം സ്വദേശി എ.എസ്. അമല് എന്നിവര്ക്കും പരുക്കേറ്റിട്ടുണ്ട്.
കേസ് അന്വേഷണത്തിന്റെ ഭാഗമായി കഴിഞ്ഞ ദിവസം പ്രതികളുമായി പോലീസ് തെളിവെടുപ്പ് നടത്തി. യൂത്ത് കോണ്ഗ്രസ്- കെഎസ്യു നേതാക്കളായ നിഖില് പൈലി, ജെറിന് ജോജോ, ജിതിന്, ടോണി തേക്കിലക്കാടന് എന്നിവരുമായാണ് തെളിവെടുപ്പ് നടത്തിയത്.
അതേസമയം കേസിലെ പ്രധാന തെളിവായ കത്തി ഇതുവരെ കണ്ടെത്താന് പൊലീസിന് സാധിച്ചിട്ടില്ല. രക്ഷപ്പെടുന്നതിനിടെ ഇടുക്കി കളക്ടറേറ്റിനു മുന്നിലുള്ള വനമേഖലയില് കത്തി ഉപേക്ഷിച്ചെന്നാണ് നിഖില് പൈലി പോലീസിനോട് പറഞ്ഞിരുന്നത്. ഒരു തവണ നിഖിലിനെ എത്തിച്ച് തെരച്ചില് നടത്തിയെങ്കിലും കത്തി കണ്ടെത്താനായില്ല.
ഒന്നാം പ്രതി നിഖില് പൈലി, രണ്ടാം പ്രതി ജെറിന് ജോജോ എന്നിവരെ ഈ മാസം 22 വരെയും 3,4,5 പ്രതികളായ ജിതിന്, ടോണി, നിതിന് എന്നിവരെ ഈ മാസം 21 വരെ ഇടുക്കി ജില്ല കോടതി കസ്റ്റഡിയില് വിട്ടു നല്കിയിരിക്കുകയാണ്. ഇടുക്കി ഡിവൈഎസ്പി ഇമ്മാനുവല് പോളിന്റെ നേതൃത്വത്തില് എട്ട് പേരുടെ സംഘമാണ് സേ് അന്വേഷിക്കുന്നത്.
