മണ്ണാര്ക്കാട്: കാഞ്ഞിരപ്പുഴ ഉദ്യാനത്തെ മലമ്പുഴ മോഡല് ആക്കുന്നതിന്റെ ഭാഗമായും, വൈദ്യുതിയുടെ പ്രസരണശേഷി വര്ധിപ്പിക്കുന്നു. ഇതിനായി 33 കെവി സബ് സ്റ്റേഷന് സ്ഥാപിക്കുന്നതിനെക്കുറിച്ച് തത്വത്തില് തീരുമാനമായി. ഇതിന്റെ ഭാഗമായി ജലസേചനവകുപ്പ്, കെഎസ്ഇബി ഉദ്യോഗസ്ഥരും സ്ഥലം സന്ദര്ശിച്ചു. സ്ഥലം കണ്ടെത്തുന്നതുമായി ബന്ധപ്പെട്ട് വൈദ്യുതവകുപ്പ് ജലസേചന വകുപ്പിന് പ്രൊപ്പോസല് നല്കിയതായി കെഎസ്ഇബി എക്സി. എന്ജിനീയര് എസ്. മൂര്ത്തി പറഞ്ഞു.
കഴിഞ്ഞ ഡിസംബര് 26ന് മന്ത്രി കെ. കൃഷ്ണന്കുട്ടി കാഞ്ഞിരപ്പുയില് വാടിക സ്മിതം ഉദ്ഘാടനം ചെയ്യാനെത്തിയപ്പോള് കെ. ശാന്തകുമാരി എംഎല്എ ഉദ്യോഗസ്ഥരുമായി ചര്ച്ച നടത്തിയശേഷം ഇക്കാര്യം മന്ത്രിയുടെ ശ്രദ്ധയില്പ്പെടുത്തിയിരുന്നു. ഇതിന്റെ ഭാഗമായാണ് 33 കെവി സബ് സ്റ്റേഷന്റെ സാധ്യത കണക്കിലെടുത്ത് പ്രപ്പോസല് നല്കിയിരിക്കുന്നത്. ഉദ്ഘാടന പ്രസംഗത്തില് ഇക്കാര്യത്തെക്കുറിച്ച് പരാമര്ശിക്കുകയുമുണ്ടായി. ഇതുസംബന്ധിച്ച് നിര്ദേശവും അദ്ദേഹം നല്കിയിരുന്നു. അതിന്റെ അടിസ്ഥാനത്തിലാണ് ധ്രുതഗതിയിലുള്ള നീക്കം.
കാഞ്ഞിരപ്പുഴ ഐബിക്ക് സമീപത്തോ, ഇറിഗേഷന് വകുപ്പ് ഓഫീസിനു സമീപത്തോ സ്ഥാപിക്കുവാനാണ് ആലോചന. ഉദ്യാനം സന്ദര്ശിക്കുന്നതിനിടെ സുരക്ഷകൂടി കണക്കിലെടുത്ത ശേഷമേ അന്തിമ തീരുമാനമുണ്ടാകൂ. കാഞ്ഞിരപ്പുഴ പഞ്ചായത്തില് വൈദ്യുതിയുടെ ലഭ്യത വര്ദ്ധിപ്പിക്കുന്നതിന്റെ ഭാഗമായി സാധ്യത പഠനം നടത്തുമെന്ന് മന്ത്രി പറഞ്ഞിരുന്നു. ഇതിന്റെ ഭാഗമായി ഡാംടോപ്പ് റോഡിന്റെ മുകളിലായി സോളാര് കോറിഡോര്, കാറ്റില് നിന്ന് വൈദ്യുതി ഉത്പാദിപ്പിക്കല്, മിനി ഹൈഡ്രോ പ്രൊ
ജക്ട് എന്നിവക്കെല്ലാം ഇവിടെ സാധിക്കുമെന്ന കണ്ടെത്തലുകളാണുള്ളത്.
മാത്രമല്ല, അട്ടപ്പാടിയിലെ അഗളിയിലെ ഭൂതല സൗരോര്ജ്ജ മോഡല് കാഞ്ഞിരപ്പുഴയിലും നടപ്പിലാക്കാന് കഴിയുമെന്നാണ് വിദഗ്ധരുടെ അഭിപ്രായം. ജലസേചന വകുപ്പിന്റെ ഏക്കര് കണക്കിന് ഭൂമിയാണ് ഇവിടെയുള്ളത്.
