തിരുവനന്തപുരം : മുഖ്യമന്ത്രി പിണറായി വിജയന് ചികിത്സക്കായി അമേരിക്കയിലേക്ക് പുറപ്പെട്ടു. കൊച്ചി നെടുമ്പാശ്ശേരി വിമാനത്താവളത്തില് നിന്നും ഇന്ന് പുലര്ച്ചെ 4.40നുള്ള എമിറേറ്റ്സ് വിമാനത്തിലാണ് മുഖ്യമന്ത്രി യാത്ര തിരിച്ചത്. ഭാര്യ കമലയും, പേഴ്സണല് അസിസ്റ്റന്റ് സുനീഷും അദ്ദേഹത്തിനൊപ്പമുണ്ട്.
യുഎസിലെ മയോ ക്ലിനിക്കിലാണ് മുഖ്യമന്ത്രിക്ക് ചികിത്സ. ഇത് മൂന്നാഴ്ചയിലേറെ നീണ്ടുനില്ക്കും. ഈ മാസം 29 വരെയാണ് ചികിത്സ. വിവരം വെള്ളിയാഴ്ച ഫോണില് ഗവര്ണറെ വിളിച്ച് മുഖ്യമന്ത്രി അറിയിച്ചിരുന്നു. യാത്രാ ചെലവ് സര്ക്കാര് വഹിക്കും.
ഇത്രയും ദിവസം മാറി നില്ക്കുകയാണെങ്കിലും അദ്ദേഹത്തിന്റെ ചുമതല മറ്റാര്ക്കും കൈമാറിയിട്ടില്ല. ക്യാബിനറ്റ് യോഗത്തില് അടക്കം മുഖ്യമന്ത്രി ഓണ്ലൈനായി പങ്കെടുക്കും. ഇതിന് മുമ്പ് 2018 സെപ്റ്റംബറിലും മുഖ്യമന്ത്രി അമേരിക്കയില് ചികിത്സ നടത്തിയിരുന്നു.
അന്നും മുഖ്യമന്ത്രിയുടെ അധികാരം മറ്റാര്ക്കും നല്കാതെ ഇ-ഫയലിംഗ് വഴിയാണ് അദ്ദേഹം ഭരണകാര്യങ്ങള് നോക്കിനടത്തിയത്. മൂന്ന് വര്ഷങ്ങള്ക്ക് ശേഷമാണ് വീണ്ടും തുടര് ചികിത്സക്ക് വേണ്ടി അദ്ദേഹം വിദേശത്തേക്ക് പോകുന്നത്.
