മലപ്പുറം: ഇടുക്കിയില് എസ്എഫ്ഐ പ്രവര്ത്തകര് കൊല്ലപ്പെട്ടതിനെത്തുടർന്ന് ഡിവൈഎഫ്ഐയും സിപിഎമ്മും നടത്തിയ പ്രതിഷേധ പ്രകടനങ്ങളില് മലപ്പുറം ജില്ലയില് വ്യാപക അക്രമം. കോണ്ഗ്രസ് കണ്വെന്ഷനില് പങ്കെടുക്കാന് കെപിസിസി പ്രസിഡന്റ് മലപ്പുറത്തെത്തിയപ്പോള് പ്രകോപനപരമായ മുദ്രാവാക്യം വിളിച്ച് സിപിഎം പ്രവര്ത്തകരെത്തിയത് സംഘര്ഷത്തിനിടയാക്കി.
ഡിവൈഎഫ്ഐയും എസ്എഫ്ഐയും പ്രത്യേകം പ്രത്യേകം പ്രതിഷേധ പ്രകടനങ്ങള് നടത്തിയിരിന്നു. പ്രകോപനപരമായ മുദ്രാവാക്യങ്ങളാണ് പ്രകടനത്തില് ഉയര്ന്നത്. മലപ്പുറം ഡിവൈഎസ്പിയുടെ നേതൃത്വത്തില് വന് പോലീസ് സംഘം പ്രദേശത്ത് ക്യാമ്പ് ചെയ്യുകയാണ്. വണ്ടൂര് ടൗണില് വിവിധയിടങ്ങളിലായി സ്ഥാപിച്ച കോണ്ഗ്രസിന്റെ ഫ്ളക്സ് ബോര്ഡുകള് സിപിഎം പ്രവര്ത്തകര് അടിച്ചുതകര്ത്തു. സംഘര്ഷ സാധ്യത കണക്കിലെടുത്ത് വണ്ടൂര് പോലീസ് ഇന്സ്പെക്ടര് ഇ. ഗോപകുമാറിന്റെ നേതൃത്വത്തില് പോലീസ് സംഘം ടൗണില് നിലയുറപ്പിച്ചിരുന്നു.
പ്രതിഷേധത്തെ തുടര്ന്ന് വണ്ടൂരില് ഒരു മണിക്കൂറോളം ഗതാഗതം തടസ്സപ്പെട്ടു.
