ഫറ്റോര്ഡ: ഐഎസ്എല്ലില് കേരള ബ്ലാസ്റ്റേഴ്സിന് സമനില. ഈസ്റ്റ് ബംഗാളുമായി ഓരോ ഗോള് നേടി സമനിലയില് പിരിഞ്ഞു. സീസണില് അഞ്ച് മത്സരങ്ങളില് നിന്ന് ബ്ലാസ്റ്റേഴ്സിന്റെ മൂന്നാം സമനിലയാണിത്.
കളിയില് മിന്നുന്ന പ്രകടനമാണ് ബ്ലാസ്റ്റേഴ്സ് നടത്തിയത്. തുടക്കം മുതല് ആക്രമണം നടത്തി. എന്നാല് കളിയുടെ ഗതിക്ക് വിപരീതമായി ആദ്യം മുന്നിലെത്തിയത് ഈസ്റ്റ് ബംഗാളാണ്. 37-ാം മിനിറ്റില് തോമിസ്ലാ മര്സീല ഈസ്റ്റ് ബംഗാളിനെ മുന്നിലെത്തിച്ചു. തുടര്ന്ന് ആക്രമണം വര്ധിപ്പിച്ച കേരളം 44-ാം മിനിറ്റില് സമനില പിടിച്ചു.
അല്വാരോ വാസക്വസ് കേരളത്തെ ഒപ്പമെത്തിക്കുകയായിരുന്നു. മത്സരത്തില് ആധിപത്യം പുലര്ത്തിയങ്കിലും കൂടുതല് ഷോട്ടുകള് ഉതിര്ത്തത് ഈസ്റ്റ് ബംഗാളാണ്. നാല് ഷോട്ടുകളാണ് പോസ്റ്റിന് നേര്ക്ക് ഉതിര്ത്തത്. മറുവശത്ത് കേരളത്തിന് രണ്ട് ഷോട്ടുകള് മാത്രമാണ് ഉതിര്ക്കാനായത്.
കളിയുടെ 70 ശതമാനം നിയന്ത്രണവും കേരളത്തിനായിരുന്നു. വിജയിച്ചിരുന്നെങ്കില് കേരളത്തിന് പോയിന്റ് പട്ടികയില് ആദ്യ നാലില് എത്താമായിരുന്നു. ഒരു മത്സരം പോലും വിജയിക്കാത്ത ഈസ്റ്റ് ബംഗാള് അവസാന സ്ഥാനത്താണ്.
