കൊളൊംബോ: ശ്രീലങ്കന് പൗരനെ മതനിന്ദ ആരോപിച്ച് പാകിസ്ഥാനില് ചുട്ടുകൊന്ന സംഭവത്തില് പ്രതിഷേധം ശക്തമാകുന്നതിനിടെ ശ്രീലങ്കയില് തുടരുന്ന പാക് ക്രിക്കറ്റ് താരങ്ങള്ക്ക് സുരക്ഷ വര്ധിപ്പിച്ചു. മുഹമ്മദ് ഹഫീസ്, വഹാബ് റിയാസ്, ഷൊഐബ് മാലിക്ക്, മുഹമ്മദ് ഉമര്, ഷൊഐബ് മഖ്സൂദ്, ഉസ്മാന് ഷിന്വാരി, അഹ്മദ് ഷഹ്സാദ്, അന്വര് അലി, മുഹമ്മദ് ഇര്ഫാന് എന്നീ പാക് താരങ്ങളാണ് ഇപ്പോള് ലങ്കയില് തുടരുന്നത്. ലങ്കന് പ്രീമിയര് ലീഗില് കലിക്കാനായി എത്തിയവരാണിവര്.
സിയാല്ക്കോട്ടിലെ വസീറാബാദ് റോഡിലുള്ള ഒരു സ്വകാര്യ ഫാക്ടറിയിലെ ജീവനക്കാരാണ് എക്സ്പോര്ട്ട് മാനേജരായ ശ്രീലങ്കക്കാരനെ കത്തിച്ചുകൊന്നത്. ഇസ്ലാമിനെ നിന്ദിച്ചു എന്ന പേരിലായിരുന്നു കൊലപാതകം. ശ്രീലങ്കക്കാരനായ 40കാരന് പ്രിയന്ത കുമാരയ്ക്കാണ് ഈ ദാരുണാന്ത്യം സംഭവിച്ചത്.
എന്നാല് പ്രിയന്ത കുമാരെ മതനിന്ദ നടത്തിയില്ലായെന്ന പാകിസ്ഥാന് മാധ്യമങ്ങള് റിപ്പോര്ട്ട് ചെയ്യുന്നു. തീവ്ര ഇസ്ലാമിക സംഘടനയായ തെഹ്റീക് ഇ ലബ്ബായിക് പാകിസ്ഥാന് (ടിഎല്പി) പാര്ട്ടിയുടെ ഒരു പോസ്റ്റര് കീറി ചവറ്റുകൊട്ടയില് ഇട്ടതാണ് സംഭവത്തിന് ആധാരമെന്ന് മാധ്യമങ്ങള് പറയുന്നു. ഇസ്ലാമിക് പാര്ട്ടിയുടെ പോസ്റ്റര് കുമാരയുടെ ഓഫീസിനടുത്തുള്ള ചുമരില് പതിച്ചിരിക്കുകയായിരുന്നു. കുമാര ഈ പോസ്റ്റര് കീറുന്നത് രണ്ട് ഫാക്ടറിത്തൊഴിലാളികള് കണ്ടിരുന്നു. ഇവര് മറ്റുള്ളവര്ക്ക് വിവരം കൈമാറി. ഇതോടെയാണ് ക്രൂരമായ ചുട്ടുകൊല്ലല് അരങ്ങേറിയതെന്ന് ഒരു ഉദ്യോഗസ്ഥന് വെളിപ്പെടുത്തി.
ഈ കൊലപാതകത്തിന്റെ വീഡിയോ ഇപ്പോള് സമൂഹമാധ്യമങ്ങളില് പ്രചരിക്കുന്നുണ്ട്. മുദ്രാവാക്യങ്ങള് മുഴക്കി നൂറുകണക്കിനാളുകള് നില്ക്കുന്നത് കാണാം. ഈ ക്രൂരമായ കൊലപാതകം കണ്ട പാക് പഞ്ചാബ് മുഖ്യമന്ത്രി ഉസ്മാന് ബസ്ദര് ഇതിനെ ദുരന്തസംഭവമെന്ന് വിശേഷിപ്പിച്ചു.
