ന്യൂദല്‍ഹി: പെട്രോളിന്റെ വാറ്റ് നികുതി 30 ശതമാനത്തില്‍ നിന്നും 19.40 ശതമാനമായി കുറയ്‌ക്കാനുള്ള തീരുമാനവുമായി ദല്‍ഹി സര്‍ക്കാര്‍. ഇതോടെ പെട്രോളിന് ലിറ്ററിന് എട്ട് രൂപ കുറയും. ഇന്ന് അര്‍ദ്ധരാത്രി മുതല്‍ പുതിയ നിരക്ക് പ്രാബല്യത്തില്‍ വരും. കേന്ദ്രസര്‍ക്കാര്‍ വിലകുറച്ചിട്ടും സംസ്ഥാന സര്‍ക്കാര്‍ നികുതി കുറക്കാത്തതില്‍ പൊതുജനങ്ങളില്‍ നിന്നു വലിയ സമ്മര്‍ദമാണ് സര്‍ക്കാരിന് നേരിടേണ്ടി വന്നത്.
കാബിനറ്റ് യോഗത്തില്‍ ഡല്‍ഹി മുഖ്യമന്ത്രി അരവിന്ദ് കെജരിവാളാണ് വിലക്കുറവ് സംബന്ധിച്ച തീരുമാനം അവതരിപ്പിച്ചത്. നിലവില്‍ 103 രൂപയാണ് ഒരു ലിറ്റര്‍ പെട്രോളിന് ഡല്‍ഹിയില്‍ വില. വിലക്കുറവ് പ്രാബല്യത്തില്‍ വരുന്നതോടെ ഇത് 95 രൂപയാകും.
പെട്രോളിനും ഡീസലിനും കേന്ദ്രസര്‍ക്കാര്‍ എക്‌സൈസ് തീരുവ കുറച്ചതിന് പിന്നാലെ നിരവധി സംസ്ഥാനങ്ങള്‍ മൂല്യ വര്‍ധിത നികുതി കുറച്ചിരുന്നു. ഇതനുസരിച്ച് ബിജെപി ഭരിക്കുന്ന സംസ്ഥാനങ്ങള്‍ നികുതി കുറച്ചിരുന്നു. പെട്രോളിനും ഡീസലിനും 12 രൂപ വീതമാണ് ഉത്തര്‍പ്രദേശും ഹരിയാനയും കുറച്ചത്. ഗുജറാത്ത്, അസം, ത്രിപുര, ഗോവ, കര്‍ണാടക, മണിപ്പൂര്‍,മിസ്സോറം സംസ്ഥാനങ്ങള്‍ ഏഴ് രൂപ വീതവും വാറ്റ് നികുതി കുറച്ചു. ബിഹാറില്‍ മൂന്ന് രൂപ 20 പൈസയും ഡീസലിന് മൂന്ന് രൂപ 90 പൈസയുമാണ് കുറച്ചത്. ഒഡീഷ സര്‍ക്കാരും മൂന്ന് രൂപ വീതം കുറച്ചു.
രാജ്യത്തെ പല സംസ്ഥാനങ്ങളും വാറ്റ് നികുതിയില്‍ ഇളവ് നല്‍കിയെങ്കിലും കേരളം നികുതി കുറയ്‌ക്കില്ലെന്ന നിലപാടിന് മാറ്റം വരുത്തിയിട്ടില്ല. നികുതി കുറയ്‌ക്കില്ലെന്ന കേരളത്തിന്റെ പിടിവാശിയില്‍ വലയുന്നത് പാവപ്പെട്ട ജനങ്ങളാണ്. ഇന്ത്യയിലെ മറ്റു സംസ്ഥാനങ്ങള്‍ നികുതി കുറച്ചപ്പോള്‍ കേരളം കൂടി നികുതി കുറയ്‌ക്കുമെന്നാണ് പ്രതീക്ഷിച്ചത്. എന്നാല്‍, ഇപ്പോഴും കേന്ദ്രസര്‍ക്കാരിനെ കുറ്റം പറഞ്ഞ് നികുതി കുറക്കാതെ തുടരുകയാണ് കേരള സര്‍ക്കാര്‍.
പ്രതികരിക്കാൻ ഇവിടെ എഴുതുക: