കൊച്ചി : മോഫിയ പര്‍വീണിനെ ആത്മഹത്യയിലേക്ക് നയിച്ചത് സിഐ സുധീറിന്റെ ഭാഗത്തു നിന്നുണ്ടായ പെരുമാറ്റമാണെന്ന് എഫ്‌ഐആര്‍. സിഐ കയര്‍ത്ത് സംസാരിച്ചതോടെ തനിക്ക് നീതി കിട്ടില്ലെന്ന മനോവിഷമത്താലാണ് മോഫിയ ആത്മഹത്യ ചെയ്തതെന്നും ഇതില്‍ പറയുന്നുണ്ട്. ഇതോടെ സിഐ സുധീര്‍ പ്രതിക്കൂട്ടിലായിരിക്കുകയാണ്.
മോഫിയ പര്‍വീണ്‍ ആത്മഹത്യയുമായി ബന്ധപ്പെട്ട് അസ്വഭാവിക മരണത്തിന് പോലീസ് രജിസ്റ്റര്‍ ചെയ്ത കേസിലെ എഫ്ഐആറിലാണ് സിഐ സുധീറിന്റെ ഭാഗത്തുനിന്നുണ്ടായ ഗുരുതര പിഴവുകള്‍ ചൂണ്ടിക്കാട്ടിയിരിക്കുന്നത്. മോഫിയയുടെ ബന്ധുവിന്റെ മൊഴിയുടെ അടിസ്ഥാനത്തിലാണ് ഇത്. പോലീസ് മേധാവിക്ക് നല്‍കിയ പരാതിയുടെ അടിസ്ഥാനത്തിലാണ് മോഫിയയുടേയും ഭര്‍ത്താവ് സുഹൈലിന്റേയും കുടുംബം ആലുവ ഈസ്റ്റ് പോലീസ് സ്‌റ്റേഷനിലേക്ക് എത്തിയത്.
സംസാരത്തിനിടെ ദേഷ്യം വന്ന് മോഫിയ ഭര്‍ത്താവ് സുഹൈലിന്റെ കരണത്തടിച്ചു. ഇതുകണ്ട സിഐ സുധീര്‍ കയര്‍ത്തു സംസാരിച്ചു. ഇതോടെ തനിക്ക് ഒരിക്കലും സിഐയില്‍ നിന്ന് നീതി കിട്ടില്ലെന്ന മനോവിഷമമാണ് അവരെ ആത്മഹത്യയിലേക്ക് നയിച്ചതെന്നാണ് എഫ്ഐആറില്‍ പറയുന്നത്. ഉച്ചയ്‌ക്ക് 12നും വൈകുന്നേരം ആറ് മണിക്ക് ഇടയ്‌ക്കുള്ള സമയത്താണ് മോഫിയ ആത്മഹത്യ ചെയ്തതെന്നും റിപ്പോര്‍ട്ടില്‍ പറയുന്നുണ്ട്.
ഭര്‍തൃപീഡനത്തിന് പരാതി നല്‍കിയ മോഫിയയെ സിഐ സുധീര്‍ സ്റ്റേഷനില്‍ വെച്ച് അധിക്ഷേപിച്ചുവെന്ന് മോഫിയയുടെ ആത്മഹത്യാക്കുറിപ്പില്‍ പറയുന്നുണ്ട്. ഭര്‍തൃപീഡനത്തെക്കുറിച്ച് പരാതിയുമായി ബന്ധപ്പെട്ട് പോലീസ് സ്റ്റേഷനിലെത്തിയ മോഫിയ പിന്നീട് വീട്ടിലേക്ക് തിരിച്ചെത്തി ആത്മഹത്യ ചെയ്യുകയായിരുന്നു. കേസില്‍ മോഫിയയുടെ ഭര്‍ത്താവ് സുഹൈലാണ് ഒന്നാം പ്രതി. ഭര്‍തൃമാതാവ് റുഖിയ രണ്ടാം പ്രതിയും ഭര്‍തൃപിതാവ് മൂന്നാം പ്രതിയുമാണ്.
കേസില്‍ ആരോപണ വിധേയനായ സിഐ സുധീറിനെ കഴിഞ്ഞ ദിവസം സസ്പെന്ഡ് ചെയ്തിരുന്നു. ആദ്യം ഇയാളെ സ്ഥലം മാറ്റുകയാണ് ഉണ്ടായതെങ്കിലും പ്രതിഷേധം കടുത്തതോടെയാണ് സസ്പെന്ഡ് ചെയ്യാന്‍ തീരുമാനിച്ചത്. ഇത് കൂടാതെ സുധീറിന്റെ നടപടികളില്‍ അന്വേഷണവും പ്രഖ്യാപിച്ചിട്ടുണ്ട്. സിഐക്കെതിരെ ഉത്ര കൊലക്കേസിലും ആരോപണം ഉയര്‍ന്നിരുന്നു. മറ്റൊരു സ്ത്രീയും സുധീറിനെതിരെ രംഗത്ത് എത്തിയതോടെയാണ് അന്വേഷണം പ്രഖ്യാപിച്ചത്. കൊച്ചി സിറ്റി ഈസ്റ്റ് ട്രാഫിക് അസി. കമ്മീഷണര്‍ക്കാണ് അന്വേഷണ ചുമതല.
പ്രതികരിക്കാൻ ഇവിടെ എഴുതുക: