കൊച്ചി: ലോകത്തിനാകെ മാതൃകയാകുന്ന തരത്തില് കോവിഡിനെതിരെ പൊരുതിയ ഇന്ത്യയുടെ പ്രവര്ത്തനങ്ങളെ ആകെ അപമാനിക്കുന്ന തരത്തിലുള്ള കാര്ട്ടൂണിന് ലളിതകലാ അക്കാദമി നല്കിയ അവര്ഡ് റദ്ദാക്കണമെന്നാവശ്യപ്പെട്ട് നല്കിയ ഹര്ജി കേരള ഹൈക്കോടതി ഫയലില് സ്വീകരിച്ചു. ഇതില് കേന്ദ്ര-സംസ്ഥാന സര്ക്കാരുകളോട് നോട്ടീസ് നല്കാന് ഹൈക്കോടതി ചൊവ്വാഴ്ച ഉത്തരവിട്ടു.
ഹൈന്ദവീയം ഫൗണ്ടേഷനാണ് ഹര്ജി നല്കിയത്. കാര്ട്ടൂണ് ഇന്ത്യയെ അപകീര്ത്തിപ്പെടുത്തുന്നതാണെന്നും അതിന് പുരസ്കാരം നല്കുന്നതു തടയണമെന്നും ഹര്ജി ആവശ്യപ്പെടുന്നു. ഒരു അന്താരാഷ്ട്ര കോവിഡ് യോഗത്തില് ഇന്ത്യയെ കാവി പുതച്ച പശുവായാണ് കാര്ട്ടൂണ് ചിത്രീകരിക്കുന്നത്. ജസ്റ്റിസ് എന്. നഗരേഷിന്റെ ബെഞ്ചാണ് ഹരജി പരിഗണിക്കുന്നത്. ഇംഗ്ലണ്ട്, ചൈന, യുഎസ് എന്നിവിടങ്ങളില് നിന്നുള്ള ഡോക്ടര്മാര്ക്കിടയില് ഇന്ത്യയെ പ്രതിനിധാനം ചെയ്യുന്നത് കാവി പുതച്ച, സന്യാസി ഭാവത്തിലുള്ള പശുവാണ്.
ദേശവിരുദ്ധമായ ചിത്രങ്ങള്ക്കും കാര്ട്ടൂണുകള്ക്കും പുരസ്കാരങ്ങള് നല്കുന്ന അക്കാദമിയുടെ ഗവേണിംഗ് സമിതിയെ പുറത്താക്കണമെന്നും പുരസ്കാര നടപടികള് സ്റ്റേ ചെയ്യണമെന്നും ഹരജിയില് ആവശ്യപ്പെട്ടിട്ടുണ്ട്.
കാര്ട്ടൂണിസ്റ്റ് അനൂപ് രാധാകൃഷ്ണനാണ് ഈ വര്ഷത്തെ ലളിതകലാ അക്കാദമി പുരസ്കാരം ലഭിച്ചിരുന്നത്. 2020 മാര്ച്ചില് വരച്ച കാര്ട്ടൂണിനാണ് അവാര്ഡ് ലഭിച്ചത്.
സവര്ണ ഫാസിസ്റ്റ് മനോഭാവങ്ങളെ വിമര്ശിക്കുന്ന കാര്ട്ടൂണാണിതെന്നാണ് അക്കാദമിയുടെ വാദം.
