തിരുവനന്തപുരം: രാജ്യത്തെ ശാസ്ത്ര സമൂഹത്തെ ഒന്നടങ്കം അവഹേളിക്കിന്നതും സംസ്ഥാന സര്‍ക്കാര്‍ വഷളത്തരത്തിന് സര്‍ക്കാര്‍ അംഗീകാരം നല്‍കിയതുമായ കാര്‍ട്ടൂണിന് മൗലികതയില്ലന്ന് ബിജെപി വക്താവ് സന്ദീപ് വാചസ്പതി. ന്യുയോര്‍ക്ക് ടൈംസില്‍ ഇന്ത്യന്‍ ബഹിരാകാശ ശാസ്ത്രജ്ഞരെ അവഹേളിക്കാന്‍ വരച്ച കാര്‍ട്ടൂണില്‍ പശു കഥാപാത്രമായിരുന്നു. രണ്ടിലും പശു കടന്നു വന്നത് യാദൃശ്ചികമല്ല. ആഗോള തലത്തില്‍ ഇന്ത്യയെ പ്രതിനിധാനം ചെയ്യാന്‍ പശുവും കാവിയും മാത്രമേ ഉള്ളൂ എന്ന് സമ്മതിച്ചതിനെ അംഗീകരിക്കുകയാണ് വേണ്ടത് . അവാര്‍ഡ് നല്കിയവര്ക്ക് ഇതേപ്പറ്റി വലിയ വെളിവൊന്നും ഇല്ലെന്നും മനസിലായി. രണ്ടു കാര്‍ട്ടൂണുകളും പ്രദര്‍ശിപ്പിച്ചുകൊണ്ടുളള ഫേസ് ബുക്ക് പോസ്റ്റില്‍ സന്ദീപ് പറഞ്ഞു
ഫേസ് ബുക്ക് പോസ്റ്റിന്റെ പൂര്‍ണ്ണരൂപം
2014 ല്‍ ന്യുയോര്‍ക്ക് ടൈംസില്‍ സിംഗപ്പൂര്‍ സ്വദേശിയായ ഹെങ് കിം സോങ് ഇന്ത്യന്‍ ബഹിരാകാശ ശാസ്ത്രജ്ഞരെ അവഹേളിക്കാന്‍ വരച്ച കാര്‍ട്ടൂണ്‍ ആണ് ആദ്യത്തേത്. ഭാരതം ചൊവ്വ ദൗത്യം ആരംഭിച്ചതിനെ താറടിക്കാനായിരുന്നു അത്. ബഹിരാകാശ രംഗത്തെ യൂറോപ്യന്‍ ആധിപത്യത്തെ ചോദ്യം ചെയ്ത ഭാരതത്തെ വംശീയമായി അവഹേളിക്കുകയായിരുന്നു ലക്ഷ്യം. സായിപ്പന്മാരുടെ വര്‍ണ്ണ വെറിയന്‍ മനോഭാവത്തിനെതിരെ വ്യാപകമായി പ്രതിഷേധം ഉയര്‍ന്നു. 4 വര്‍ഷങ്ങള്‍ക്കിപ്പുറം ന്യുയോര്‍ക്ക് ടൈംസ് നിരുപാധികം മാപ്പ് പറഞ്ഞ് കാര്‍ട്ടൂണ്‍ പിന്‍വലിച്ചു.
7 വര്‍ഷങ്ങള്‍ക്കിപ്പുറം സ്വന്തം രാജ്യത്തെ ശാസ്ത്ര സമൂഹത്തെ ഒന്നടങ്കം അവഹേളിച്ച വഷളത്തരത്തിന് സര്‍ക്കാര്‍ അംഗീകാരം നല്‍കിയ കാര്‍ട്ടൂണ്‍ ആണ് രണ്ടാമത്തേത്. രണ്ടിലും പശു കടന്നു വന്നത് യാദൃശ്ചികമല്ലെന്ന് വിശ്വസിക്കാനാണ് എനിക്കിഷ്ടം. (പുതിയ കാര്‍ട്ടൂണിന് മൗലികത ഇല്ലെന്ന് ഇതോടെ തെളിഞ്ഞു. അവാര്‍ഡ് നല്കിയവര്ക്ക് ഇതേപ്പറ്റി വലിയ വെളിവൊന്നും ഇല്ലെന്നും മനസിലായി.) ആഗോള തലത്തില്‍ ഇന്ത്യയെ പ്രതിനിധാനം ചെയ്യാന്‍ പശുവും കാവിയും മാത്രമേ ഉള്ളൂ എന്ന് സമ്മതിച്ചതിന് ഈ മഹാനെ അംഗീകരിക്കുകയാണ് വേണ്ടത് എന്നാണ് എന്റെ അഭിപ്രായം. പശു ദേശീയത എന്ന പരിഹാസം ആദരമായി കാണുകയാണ്. ഈ നാടിന്റെ നട്ടെല്ല് പശുവും കാവിയും തന്നെയാണ്. അതില്‍ നാണക്കേട് തോന്നാത്തിടത്തോളം ഈ ചിത്രീകരണം അഭിനന്ദനം അര്‍ഹിക്കുന്നു.
പശുവിനെ ആരാധിക്കുന്ന കാഷായം ധരിക്കുന്ന ഈ പ്രകൃതന്മാര്‍ തന്നെയാണ് അറിവിന്റെ ഭണ്ഡാരമായ വേദങ്ങള്‍ സൃഷ്ടിച്ചത്. ലോകത്തിന് ശാന്തി മന്ത്രം ഓതി കൊടുത്തവരും പ്രകൃതി സംരക്ഷണത്തിന്റെ പ്രാധാന്യം ലോകത്തിന് ഉപദേശിച്ചതും ലോകത്തിലെ ഏറ്റവും വലിയ ജനാധിപത്യ രാഷ്‌ട്രത്തെ സംഭാവന ചെയ്തതും സൂപ്പര്‍ സോണിക് മിസൈല്‍ വികസിപ്പിച്ചതും ലോകത്തെ ഏറ്റവും ചെലവ് കുറഞ്ഞ ബഹിരാകാശ ദൗത്യങ്ങള്‍ വിജയകരമായി നടപ്പാക്കുന്നതും ലോകത്തിലെ ഏറ്റവും വലിയ വാക്‌സിനേഷന്‍ പദ്ധതി നടപ്പാക്കുന്നതും എല്ലാം ഇതേ കാവി പശുക്കള്‍ തന്നെയാണ്.
വേട്ടയാടി കിട്ടിയ മൃഗങ്ങളെ ചുട്ടെങ്കിലും തിന്നണം എന്ന ബോധം മറ്റുള്ളവര്‍ക്ക് ഇല്ലാത്ത കാലത്താണ് ഇവര്‍ വേദങ്ങളും ഉപനിഷത്തുകളും ഇതിഹാസങ്ങളും രചിച്ചത്. ഇവര്‍ തന്നെയാണ് ശസ്ത്രക്രിയ ലോകത്തിന് പരിചയപ്പെടുത്തിയതും. അതിനാല്‍ ഈ കാര്‍ട്ടൂണ്‍ വരച്ച കൃതഹസ്തത അനുമോദനം അര്‍ഹിക്കുന്നു. ആയിരം കോഴിക്ക് അരക്കാട എന്നപോലെ ടൈയ്യും കോട്ടും കെട്ടി വരുന്ന ചൈനാ തലയന്മാര്‍ക്ക് തുല്യം നില്‍ക്കാന്‍ ഒരു ഇന്ത്യന്‍ പശു മതിയെന്ന അങ്ങയുടെ കണ്ടെത്തലിന് ഇരിക്കട്ടെ ഒരു കുതിരപ്പവന്‍.
