പ്രേക്ഷകര്‍ ഏറെ ആകാംക്ഷയോടെ കാത്തിരിക്കുന്ന മരക്കാര്‍ അറബിക്കടലിന്റെ സിംഹം എന്ന ബ്രഹ്‌മാണ്ഡ ചിത്രം വീണ്ടും സമൂഹ മാധ്യമങ്ങളില്‍ വൈറലാകുന്നു. സിനിമാ ചിത്രീകരണ വേളയില്‍ തമിഴകത്തിന്റെ തല അജിത്ത് അതിഥിയായി എത്തിയതിന്റെ വീഡിയോയാണ് ഇപ്പോള്‍ പുറത്തുവന്നിരിക്കുന്നത്.
സെറ്റിലെത്തിയ അജിത്തിനെ മോഹന്‍ലാലും പ്രിയദര്‍ശനുമടക്കമുള്ളവര്‍ ചേര്‍ന്ന് സ്വീകരിച്ചു. ചിത്രത്തില്‍ പ്രധാന കഥാപാത്രങ്ങളെ അവതിരിപ്പിക്കുന്ന അര്‍ജുന്‍, സുനില്‍ ഷെട്ടി, നെടുമുടി വേണു, മുകേഷ്, സിദ്ദിഖ് എന്നിവരുമായി അജിത് കുശലം പറയുന്നതും വീഡിയോയില്‍ കാണാം. സെറ്റിലുള്ള എല്ലാവരേയും കണ്ട് പരിചയപ്പെട്ടതിനു ശേഷമായിരുന്നു അജിത്തിന്റെ മടക്കം.
ചിത്രം ഒടിടി റിലീസായിരിക്കുമോ അതോ തീയേറ്ററുകളില്‍ പ്രദര്‍ശനത്തിന് എത്തുമോയെന്നത് സംബന്ധിച്ച കാര്യങ്ങളില്‍ ഇപ്പോഴും ചര്‍ച്ചകള്‍ നടന്നു വരികയാണ്. ഈ സാഹചര്യത്തില്‍ അണിയപ്രവര്‍ത്തകര്‍ തലയ്‌ക്കൊപ്പമുള്ള വീഡിയോ പുറത്തുവിട്ടിരിക്കുന്നത്.
മലയാളത്തിലെ എക്കാലത്തെയും ഉയര്‍ന്ന ബജറ്റ് ചിത്രമായ മരക്കാര്‍ 100 കോടി മുതല്‍ മുടക്കിലാണ് ചിത്രീകരിച്ചിരിക്കുന്നത്. പോയ വര്‍ഷം റിലീസിനെത്തേണ്ടിയിരുന്ന ചിത്രമായിരുന്ന മരക്കാര്‍ കോവിഡും മറ്റ് കാര്യങ്ങളേയും തുടര്‍ന്ന് നീണ്ട് പോവുകയായിരുന്നു. ആറ് ദേശീയ പുരസ്‌കാരങ്ങള്‍ കരസ്ഥമാക്കിയ ചിത്രത്തില്‍ പ്രണവ് മോഹന്‍ലാല്‍, അര്‍ജുന്‍, സുനില്‍ ഷെട്ടി, പ്രഭു, മഞ്ജു വാര്യര്‍, സുഹാസിനി, കീര്‍ത്തി സുരേഷ്, കല്യാണി പ്രിയദര്‍ശന്‍, ഫാസില്‍, സിദ്ദിഖ്, നെടുമുടി വേണു, ഇന്നസെന്റ് തുടങ്ങി പ്രമുഖ താരനിര തന്നെ അഭിനയിക്കുന്നുണ്ട്.
പ്രതികരിക്കാൻ ഇവിടെ എഴുതുക: