ദുബൈ: ബോളിവുഡ് സൂപ്പർ താരം ഷാരൂഖ് ഖാൻ 56ാം പിറന്നാളിന് ഇക്കുറി ഇരട്ടിമധുരം. മകന്‍ ആര്യന്‍ഖാന്‍ ജയില്‍ വിമോചിതനായി ദീപാവലിയ്‌ക്ക് മുന്‍പ് എത്തിയതോടെ ചൊവ്വാഴ്ചത്തെ പിറന്നാൾ ആഘോഷം ഗംഭീരമായി. ഷാരൂഖിന്റെ വസതിയായ മന്നത്തില്‍ പ്രത്യേകമായി ലൈറ്റുകള്‍കൊണ്ടലങ്കരിച്ചിരുന്നു. സെലിബ്രിറ്റികളും ആരാധകരുമടക്കം നിരവധിയാളുകൾ താരത്തിന് ആശംസകളുമായെത്തിയിരുന്നു. സമൂഹമാധ്യമങ്ങളില്‍ ആശംസകളുടെ നിരന്തരപ്രവാഹമായിരുന്നു.
പക്ഷെ ഷാരൂഖ് ഖാന് എഴുകടലിനക്കരെ ദുബായിലും ഒരു വലിയ പിറന്നാള്‍ ആശംസ കാത്തിരിക്കുന്നുണ്ടായിരുന്നു. ലോകത്തിലെ ഏറ്റവും ഉയരം കൂടിയ കെട്ടിടമായ ബുര്‍ജ് ഖലീഫയെന്ന അംബരചുംബിയായ കെട്ടിടത്തിന്റെ ഭിത്തിയില്‍ ഷാരൂഖ് ഖാന് ജന്മദിനാശംസ നേരുന്ന പ്രത്യേക വീഡിയോ പ്രദര്‍ശിപ്പിച്ചു. ചൊവ്വാഴ്ച രാത്രി കിങ് ഖാന് പിറന്നാൾ സമ്മാനവുമായി ‘ബുർജ് ഖലീഫ’ പ്രകാശം തൂകി. ദുബൈയിലെ ബുർജ് ഖലീഫയുടെ ഭിത്തിയിൽ പ്രദർശിപ്പിച്ച ജന്മദിന സന്ദേശത്തിന്റെ വിഡിയോ പിന്നീട് ബിസിനസുകാരനായ മുഹമ്മദ് അലബ്ബാർ ട്വിറ്ററിൽ പങ്കുവെച്ചു.
‘ഹാപ്പി ബർത്ത് ഡേ ഷാരൂഖ്’ എന്നാണ് ആദ്യം പ്രദർശിപ്പിച്ചത്. ശേഷം ഷാരൂഖിന്റെ ചിത്രമടക്കം ‘വീ ലവ് യൂ’ എന്ന് തെളിഞ്ഞുവന്നു. ബ്ലോക്ക്ബസ്റ്റർ ചിത്രമായ ‘ദിൽവാലേ ദുൽഹനിയ ലേജായേഗേ’ എന്ന സൂപ്പർഹിറ്റ് ചിത്രത്തിലെ ‘തുജെ ദേഖ തോ യെ ജാനാ സനം’ എന്ന ഗാനത്തിന്റെ പശ്ചാത്തലത്തിലായിരുന്നു വീഡിയോ.
ദുബായിലെ മലയാളികളും പ്രിയതാരത്തിന് ദുബായ് സവിശേഷമായ രീതിയില്‍ ജന്മദിനാശംസ നേരുന്നത് കാണാന്‍ ബുര്‍ജ് ഖലീഫയ്‌ക്ക് മുന്നില്‍ തടിച്ചുകൂടിയിരുന്നു. പലരും ദൂരെയുള്ള കെട്ടിടങ്ങളിലിരുന്ന് ബുര്‍ജ് ഖലീഫയുടെ ഭിത്തിയില്‍ ഷാരൂഖിന്റെ ചിത്രം മിന്നിമറയുന്നത് ആസ്വദിച്ചു. കഴിഞ്ഞ വര്‍ഷവും ബുര്‍ജ് ഖലീഫ ഷാരൂഖ് ഖാന് ആശംസ അറിയിച്ചിരുന്നു.
പ്രതികരിക്കാൻ ഇവിടെ എഴുതുക: