ധാക്ക: ബംഗ്ലാദേശില്‍ കഴിഞ്ഞ കുറച്ച് ദിവസങ്ങളായി തുടരുന്ന ഹിന്ദു വിരുദ്ധ കലാപത്തിന്റെ കാരണക്കാരനെ കണ്ടെത്തി പോലീസ്. ദുര്‍ഗാ ദേവീ പന്തലില്‍ ഖുറാന്‍ കൊണ്ടുവച്ച യുവാവിനെയാണ് സിസിടിവി ദൃശ്യങ്ങളുടെ സഹായത്തോടെ പോലീസ് പിടികൂടിയത്. 35കാരനായ ഇഖ്ബാല്‍ ഹുസൈന്‍ എന്നയാളാണ് പിടിയിലായത്. കൊമില്ലയിലെ സുജാനഗര്‍ സ്വദേശിയാണ് ഇയാള്‍. ഒക്ടോബര്‍ 13ന് ഹുസൈന്‍ ദുര്‍ഗാ ദേവീ പന്തലില്‍ കടന്ന് ഖുറാന്‍ അവിടെ വയ്‌ക്കുന്ന ദൃശ്യങ്ങളാണ് പോലീസിന് ലഭിച്ചത്. സിസിടിവി ദൃശ്യങ്ങളുടെ അടിസ്ഥാനത്തില്‍ നടത്തിയ അന്വേഷണത്തിലാണ് പ്രതിയെ പിടികൂടിയതെന്ന് കൊമില്ല എസ്പി ഫാറൂഖ് അഹമ്മദ് പറഞ്ഞു. കസ്റ്റഡിയിലുള്ള ഇയാളെ വിശദമായി ചോദ്യം ചെയ്ത് വരികയാണെന്നും പോലീസ് പറഞ്ഞു.
പന്തലില്‍ സ്ഥാപിച്ച സിസിടിവിയില്‍ നിന്നാണ് ഇയാളുടെ ചിത്രങ്ങള്‍ ലഭിച്ചത്. പള്ളിയില്‍ നിന്ന് ഇയാള്‍ ഖുറാന്‍ എടുക്കുന്നതിന്റെ ദൃശ്യങ്ങളും ലഭിച്ചിട്ടുണ്ട്. പന്തലിനുള്ളില്‍ കടന്ന് ദേവീ വിഗ്രഹത്തിന് സമീപം ഇയാള്‍ ഖുറാന്‍ വയ്‌ക്കുന്നത് സിസിടിവിയില്‍ വ്യക്തമാണ്. ഇതിന് ശേഷം ഇയാള്‍ ഹനുമാന്‍ സ്വാമിയുടെ വിഗ്രഹത്തിന് സമീപത്തേക്കും പോകുന്നുണ്ട്. ദുര്‍ഗാദേവിയുടെ കാല്‍പ്പാദത്തിന് സമീപം ഖുറാന്‍ കണ്ടുവെന്ന് ആരോപിച്ചാണ് ഇസ്ലാമിക തീവ്രവാദികള്‍ രാജ്യത്തുടനീളം ഹിന്ദു വിരുദ്ധ കലാപം അഴിച്ച് വിട്ടത്.
രാജ്യത്തെ നിരവധി ക്ഷേത്രങ്ങളും വിഗ്രഹങ്ങളും അക്രമികള്‍ നശിപ്പിച്ചു. അഞ്ച് പേരാണ് ആക്രമണത്തില്‍ കൊല്ലപ്പെട്ടത്. നൂറോളം പേര്‍ക്ക് പരിക്കേറ്റു. ദുര്‍ഗാപൂജയോട് അനുബന്ധിച്ച് നിര്‍മ്മിച്ച പൂജാ പന്തലുകളും വ്യാപകമായി നശിപ്പിക്കപ്പെട്ടു. ഹിന്ദുക്കളുടെ വീടുകളും ഇസ്ലാമിക തീവ്രവാദികള്‍ അടിച്ച് നശിപ്പിച്ചിരുന്നു. ഇതോടെ മേഖലയില്‍ സര്‍ക്കാര്‍ അടിയന്തരാവസ്ഥ പ്രഖ്യാപിക്കുകയും ചെയ്തു. ആക്രമണങ്ങളെ ഇന്ത്യയും അമേരിക്കയും ഉള്‍പ്പെടെയുള്ള രാജ്യങ്ങള്‍ ശക്തമായി അപലപിച്ചിരുന്നു. വിഷയത്തില്‍ ശക്തമായ നടപടി എടുക്കണമെന്നും ഇന്ത്യ ബംഗ്ലാദേശ് സര്‍ക്കാരിനോട് ആവശ്യപ്പെട്ടിരുന്നു
പ്രതികരിക്കാൻ ഇവിടെ എഴുതുക: