തൃശ്ശൂര്: കേരളത്തിലെ നഗരഗ്രാമീണ പ്രദേശങ്ങളിലെ മാനസികാരോഗ്യ സാക്ഷരത വര്ധിപ്പിക്കുക എന്ന ലക്ഷ്യത്തോടെ ആരംഭിച്ച മീ ഹെല്പ് ഇന്ത്യ ( http://mehelp-india.org/) പ്രൊജക്റ്റ് അവസാന ഘട്ടത്തില്. മൂന്ന് വര്ഷമായി നടക്കുന്ന പഠനത്തിന്റെ കണ്ടെത്തലുകള് പങ്കുവയ്ക്കാനും മേഖലയിലെ വിദഗ്ധരുമായി സംവദിക്കാനുമായി സംഘടിപ്പിക്കുന്ന ഓണ്ലൈന് കോണ്ഫറസിനു തുടക്കമായി. ആറ് ദിവസത്തെ പരിപാടി രണ്ടു ഭാഗങ്ങളായാണ് സംഘടിപ്പിച്ചിരിക്കുന്നത്. 22 വരെ നീളുന്ന കേരള കോണ്ഫറന്സും 25നു തുടങ്ങി 27നു അവസാനിക്കുന്ന പാന് ഇന്ത്യ കോണ്ഫറന്സും. എല്ലാ ദിവസവും വൈകിട്ട് 4.30 മുതല് 7.50 വരെയാണ് പരിപാടി. രജിസ്ട്രേഷന് സൗജന്യമാണ്.
സമൂഹത്തിന്റെ നാനാതുറകളിലുള്ളവര്ക്ക് പങ്കെടുക്കാന് കഴിയുന്ന സമ്മേളനം കേരള സര്വകലാശാല ഹെല്ത്ത് സയന്സസ് വകുപ്പ് മേധാവി ഡോ. മോഹനന് കുന്നുമ്മേല് ഉദ്ഘാടനം ചെയ്തു. ഡോ. ജയപ്രകാശന്, ഡോ. ഷാജി കെ.എസ്, ഡോ. വര്ഗീസ് പൊന്നൂസ്, ഡോ. വിനു പ്രസാദ്, ഡോ. നാരായണന് എന്നിവര് ആദ്യദിന സമ്മേളനത്തില് പങ്കെടുത്തു. ഇവര്ക്ക് പുറമെ നടി അര്ച്ചന കവി, സംവിധായകന് ഡോണ് പാലത്തറ, ഡോ. ഇന്ദു പി.എസ്, ഡോ. കൃഷ്ണകുമാര്, ഡോ. സി.ജെ ജോണ്, ഡോ. അഖില് മാനുവെല് തുടങ്ങിയവരും സമ്മേളനത്തിന്റെ ഭാഗമാക്കും. കൂടുതല് വിവരങ്ങള്ക്ക്: http://mehelp-india.org/
2018ലാണ് ഇന്ത്യയിലെയും യുകെയിലെയും മാനസികാരോഗ്യ വിദഗ്ധരെയും കലാരംഗത്തുള്ളവരെയും ഉള്പ്പെടുത്തിക്കൊണ്ടുള്ള മീഹെല്പ് പ്രൊജക്റ്റ് ആരംഭിച്ചത്. യു.കെയിലെ ലെയ്സെസ്റ്ററിലുള്ള ഡീ മൊന്ഡ്ഫോര്ട് യൂണിവേഴ്സിറ്റിയിലെ ഹെല്ത്ത് ആന്ഡ് ലൈഫ് സയന്സസ് വകുപ്പില് മെന്റല് ഹെല്ത്ത് വിഭാഗം അധ്യാപകനായ ഡോ. രഘു രാഘവനാണ് പഠനത്തിന് നേതൃത്വം നല്കിയത്. കേരളത്തിലെ എട്ട് പ്രദേശങ്ങള് (ചോറ്റാനിക്കര, ഇടപ്പള്ളി, എലപ്പുള്ളി, അട്ടപ്പാടി, വൈലത്തൂര്, പൊന്നാനി, പയ്യോളി, കോഴിക്കോട്) തെരഞ്ഞെടുത്ത് അവയുടെ സംസ്കാരത്തിനു അനുസൃതമായ മാനസികാരോഗ്യ സാക്ഷരത വളര്ത്തിയെടുക്കുക എന്നതായിരുന്നു പ്രധാനോദ്ദേശ്യം.
