കട്ടപ്പന: പ്രേതബാധ ഒഴിപ്പിക്കാമെന്ന് പറഞ്ഞ് റിട്ട.ഹെഡ്മിസ്ട്രസിന്റെ നാലുപവന്‍ മോഷ്ടിച്ച യുവാവ് അറസ്റ്റ്. കട്ടപ്പനക്കാരന്‍ ജോയ്‌സ് ജോസഫ് ആണ് കോട്ടയം ഡിവൈഎസ്പിയും സംഘവും അറസ്റ്റു ചെയ്തത്. ഡേവിഡ് ജോണെന്ന പേരില്‍ ഫെയ്‌സ് ബുക്ക് അക്കൗണ്ടിലൂടെയാണ് ഇയാള്‍ ബാധയൊഴിപ്പിക്കലിന് ആള്‍ക്കാരെ തിരഞ്ഞിരുന്നത്. നിരന്തരം പ്രേത സ്വപ്നങ്ങള്‍ പതിവായതോടെയാണ് റിട്ട: ഹെഡ് മിസ്ട്രസ്സ് പൂജനടത്താന്‍ തീരുമാനിച്ചത്.അതിന്റെ ഭാഗമായി ഫെയ്‌സ്ബുക്കില്‍ ഡേവിഡ് ജോണ്‍ എന്ന കള്ളപ്പേരില്‍ പ്രതി നടത്തിവന്നിരുന്ന അക്കൗണ്ടില്‍ കയറി ടീച്ചര്‍ തന്റെ സംശയങ്ങള്‍ ചോദിക്കുക പതിവായിരുന്നു.
തുടര്‍ന്ന് പ്രേതബാധ ഒഴിപ്പിക്കാന്‍ എന്ന വ്യാജേന ഇയാള്‍ കുപ്പികളും, കുടവും, മഞ്ചാടിക്കുരുവും മറ്റ് പൂജാ സാധനങ്ങളുമായി ടീച്ചറുടെ വീട്ടിലെത്തുകയായിരുന്നു.പൂജ നടക്കുന്നതിനിടെ ശക്തമായ ബാധയാണെന്നും അതിനാല്‍ സ്വര്‍ണ്ണം കൂടി വേണമെന്ന് പറഞ്ഞ് മഞ്ചാടിക്കുരുവും ശങ്കും രുദ്രാക്ഷവും ഇട്ട കുടത്തിലേക്ക് സ്വര്‍ണമാല ഊരി ഇടാന്‍ ആവശ്യപ്പെടുകയായിരുന്നു.
ജോയ്‌സ് പറഞ്ഞതനുസരിച്ച് ടീച്ചര്‍ കുടത്തിലേയ്‌ക്ക് നാല് പവന്റെ മാല ഇട്ടു. ഇതോടെ പൂജ തുടങ്ങിയ ജോയിസ് ടീച്ചറിനോട് കണ്ണുകള്‍ അടച്ച് പിടിക്കാനും താന്‍ പറയാതെ കണ്ണ് തുറക്കരുതെന്നും പറഞ്ഞു. ടീച്ചര്‍ കണ്ണുകള്‍ അടച്ചതോടെ മാല കൈക്കലാക്കിയ ശേഷം കുടം അടച്ച് കെട്ടി. പരാസൈക്കോളജിയില്‍ റിസര്‍ച്ച് നടത്തുന്ന വ്യക്തിയാണെന്നും പരാസൈക്കോളജിയും പരാമ്പരാ?ഗത വിശ്വാസങ്ങളും ചേര്‍ന്നു പോയാല്‍ മാത്രമെ ആത്മാവിനെ ബന്ധിക്കാന്‍ സാധിക്കു എന്ന് ടീച്ചറെ വിശ്വസിപ്പിക്കുകയായിരുന്നു. അതിനായി അദൃശ്യനായ ഒരു അച്ഛനുമായി താന്‍ സംസാരിക്കുന്നുണ്ടെന്ന് അയാള്‍ ടീച്ചറെ പറഞ്ഞ് വിശ്വസിപ്പിച്ചു. തുടര്‍ന്ന് അച്ഛന്റെ നിര്‍ദ്ദേശ പ്രകാരം മാലയിട്ട കുടം അടച്ചു വെയ്‌ക്കുകയായിരുന്നു. അഞ്ച് ദിവസത്തിന് ശേഷമേ കുടം തുറക്കാവൂ എന്ന് പറഞ്ഞ് ജോയ്‌സ് പോവുകയായിരുന്നു.
അഞ്ചാം ദിവസം ടീച്ചര്‍ ആകാംഷ അടക്കാനാകാതെകുടം തുറന്നപ്പോള്‍ മാല കാണാനില്ല. ഇതോടെ കോട്ടയം ഡിവൈഎസ്പി ഓഫീസില്‍ ബന്ധപ്പെടുകയായിരുന്നു. തുടര്‍ന്ന് പോലീസിന്റെ നിര്‍ദ്ദേശ പ്രകാരം ജോയ്‌സിനെ ടീച്ചര്‍ വിളിക്കുകയും കുടം തുറക്കുന്ന കാര്യം പറയുകയുമായിരുന്നു.ബാധയ്‌ക്ക് കൂടുതല്‍ ശക്തിയുള്ളതിനാല്‍ 21 ദിവസം കഴിഞ്ഞ് മാത്രമേ കുടം തുറക്കാവൂ എന്ന് അച്ഛന്‍ പറഞ്ഞതായി ജോയ്‌സ് പറഞ്ഞു വിശ്വസിപ്പിക്കാന്‍ ശ്രമിച്ചു.
തുടര്‍ന്നു നടത്തിയ പോലീസിന്റെ ഇടപെടലില്‍ ജോയ്‌സിനെ കട്ടപ്പനയില്‍ നിന്ന് അറസ്റ്റു ചെയ്തു.
കോട്ടയം ഡിവൈഎസ്പി. ജെ സന്തോഷ് കുമാറിന്റെ നേതൃത്വത്തില്‍ ഗാന്ധിനഗര്‍ എസ്എച്ച്ഒ ഷിജി, എസ്‌ഐ ഉദയകുമാര്‍ ടിപി, എഎസ്‌ഐ കെഎസ് അരുണ്‍ കുമാര്‍, സിപിഒ മാരായ നിഷാദ്, രാധാകൃഷ്ണന്‍, എന്നിവരുടെ നേത്യത്വത്തിലുള്ള സംഘമാണ് കട്ടപ്പന പൊലീസിന്റെ സഹായത്തോടെ ജോയ്‌സിനെ അറസ്റ്റ് ചെയ്തത്.
പ്രതികരിക്കാൻ ഇവിടെ എഴുതുക: