ന്യൂദല്ഹി: ഒളിമ്പിക്ക് സ്വണ മെഡല് ജേതാവ് നീരജ് ചോപ്രയുടെ ജാവലിന് ലേലത്തുകയായി ലഭിച്ചത് ഒരു കോടിരൂപ. ലേലത്തിന് ഒരു ദിവസം കൂടി ശേഷിക്കെ വില ഇനിയും ഉയരാനാണ് സാധ്യത. ഒളിമ്പിക്ക് താരങ്ങള് ഒരുക്കിയ വിരുന്നില് തനിക്ക് സ്വര്ണം നേടിത്തന്ന ജാവലിന് നീരജ് മോദിക്ക് കൈമാറിയിരുന്നു. ഇതാണ് നമാമി ഗംഗേ പദ്ധതിയുടെ ധനസമാഹരണാര്ദ്ധം ലേലത്തിനായി വെച്ചിരിക്കുന്നത്.
ഓണ്ലൈനായാണ് ലേലം സംഘടിപ്പിച്ചിരിക്കുന്നത്. https://pmmementos.gov.in എന്ന സൈറ്റിലൂടെ ഒക്ടോബര് 7 വരെ ലേലത്തില് പങ്കെടുക്കാം. ഗംഗാ നദിയെ പുനരുജ്ജീവിപ്പിക്കാനുള്ള കര്മ്മ പദ്ധതി ‘നമാമി ഗംഗേ’ മിഷന്റെ നിധി സമാഹണത്തിന്റെ ഭാഗമായാണ് ലേലം. കേന്ദ്ര സാംസ്കാരിക മന്ത്രാലയത്തിന്റെ മേല്നോട്ടത്തിലാണ് പരിപാടി സംഘടിപ്പിച്ചിരിക്കുന്നത്.
പ്രധാനമന്ത്രിക്ക് സമ്മാനമായി ലഭിച്ച അയോധ്യ രാമക്ഷേത്രത്തിന്റെ പ്രതിരൂപം, ചാര്ധാം, രുദ്രാക്ഷ കണ്വെന്ഷന് സെന്റര് മോഡലുകള്, ശില്പങ്ങള്, പെയിന്റിംഗുകള്, അംഗവസ്ത്രങ്ങള് എന്നിവയാണ് ലേലവസ്തുക്കള്. രാജ്യത്തിനായി മെഡലുകള് നേടിയ ഒളിമ്പ്യന്മാരും പാരാലിമ്പിയന്മാരും സമ്മാനിച്ച സ്പോര്ട്സ് ഗിയറും ഉപകരണങ്ങളും ലേലം ചെയ്യുന്ന വസ്തുക്കളില് ഉള്പ്പെടുന്നു. പി.വി സിന്ധു ഒളിമ്പിക്സില് ഉപയോഗിച്ച റാക്കറ്റും ലേലത്തിനുണ്ട്.
