കൊല്‍ക്കൊത്ത: മമത ബാനര്‍ജിയുടെ താലിബാന്‍ ശൈലിയുള്ള ഭരണത്തില്‍ നിന്നും ബംഗാളിനെ സംരക്ഷിയ്‌ക്കുമെന്ന് പുതുതായി ബിജെപി ബംഗാള്‍ പ്രസിഡന്റായി ചുമതലയേറ്റ സുകന്ദ മജുംദാര്‍.
ബിജെപി പ്രസിഡന്റായി ചുമതലയേറ്റശേഷം സുകന്ദ മജുംദാറിന്റെ ആദ്യപ്രതികരണമായിരുന്നു ഇത്. 2015 മുതല്‍ ബിജെപിയുടെ അധ്യക്ഷനായ ദിലീപ് ഘോഷിന് പകരക്കാരനായാണ് സുകന്ദ മജുംദാര്‍ എത്തുന്നത്. 2019ലെ ലോക്‌സഭാ തെരഞ്ഞെടുപ്പില്‍ ബലൂര്‍ഘട്ട് മണ്ഡലത്തില്‍ നിന്നും തൃണമൂലിന്റെ അര്‍പിത ഘോഷിനെതിരെ 33,293 വോട്ടുകള്‍ക്ക് വിജയം നേടിയ വ്യക്തിയാണ് സുകന്ദ മജുംദാര്‍.
പഴയ ബിജെപി പ്രസിഡന്‍റ് ദിലീപ് ഷോഷില്‍ നിന്നും പ്രതിപക്ഷനേതാവ് സുവേന്ദു അധികാരിയില്‍ നിന്നും നിര്‍ദേശങ്ങള്‍ സ്വീകരിച്ച് മുന്നോട്ട് പോകുമെന്ന് സുകന്ദ മജുംദാര്‍ പറഞ്ഞു. ബിജെപിയില്‍ നിന്നും തൃണമൂലിലേക്ക് പോയവരെക്കുറിച്ചുള്ള ചോദ്യത്തിന് അദ്ദേഹത്തിന്റെ മറുപടി ഇതായിരുന്നു: ‘പാര്‍ട്ടിയുടെ ആദര്‍ശത്തില്‍ വിശ്വസിക്കുന്നവര്‍ക്കറിയാം പാര്‍ട്ടിയുടെ യഥാര്‍ത്ഥ കരുത്ത് ബൂത്ത് തല പ്രവര്‍ത്തകരാണ്. ഇനി നാളെ ഞാന്‍ തന്നെ പാര്‍ട്ടി വിട്ടാലും അത് പാര്‍ട്ടിയെ ബാധിക്കില്ല, കാരണം പാര്‍ട്ടിക്ക് വേണ്ടി സമരം ചെയ്യാന്‍ പ്രവര്‍ത്തകരുണ്ടായിരിക്കും’.
ദിലീപ് ഘോഷ് ബിജെപി പ്രസിഡന്‍റായിരുന്നപ്പോള്‍ 2016ലെ ബംഗാള്‍ തെരഞ്ഞെടുപ്പില്‍ മൂന്ന് സീറ്റുകളില്‍ വിജയിച്ച് ബിജെപി ബംഗാളില്‍ അക്കൗണ്ട് തുറന്നു. പിന്നീട് 2019ലെ ലോക്‌സഭാ തെരഞ്ഞെടുപ്പില്‍ 42 ല്‍ 18 സീറ്റുകള്‍ നേടി സാന്നിധ്യം വര്‍ധിപ്പിച്ചു. 2021ലെ നിയമസഭാ തെരഞ്ഞെടുപ്പില്‍ മമത വീണ്ടും 213 സീറ്റുകള്‍ നേടി അധികാരത്തില്‍ തിരിച്ചെത്തിയെങ്കിലും ബിജെപിയ്‌ക്ക് 77 നിയമസഭാ സീറ്റുകള്‍ പിടിക്കാനായി. നന്ദിഗ്രാമില്‍ മമതയെ വീഴ്‌ത്തിയ സുവേന്ദു അധികാരിയെ പ്രതിപക്ഷനേതാവാക്കിയപ്പോള്‍ ബിജെപിയുടെ മറ്റൊരു നേതാവ് മുകുള്‍ റോയി നിരാശനായി. അദ്ദേഹം തൃണമൂലിലേക്ക് തിരിച്ചുപോയി. പിന്നീട് ബിജെപി എംഎല്‍എമാരായ ബിശ്വജിത് ദാസും സൗമന്‍ റോയിയും തൃണമൂലിലേക്ക് മടങ്ങിപ്പോയി. ഇപ്പോള്‍ ബിജെപിയുടെ നിയമസഭയിലെ കരുത്ത് 71 സീറ്റുകള്‍ മാത്രമാണ്. ആറ് എംഎല്‍എമാര്‍ വിട്ടുപോയി. എന്തായാലും വീണ്ടും കൂടുതല്‍ കരുത്തോടെ തൃണമൂലിനെ നേരിടാനാണ് കരുത്തനായ സുകന്ദ മജുംദാറിനെ ബിജെപിയുടെ കടിഞ്ഞാണ്‍ ഏല്‍പ്പിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: