കൊല്ലം: അഫ്സാന പര്വീണ് ഇനി ജില്ലയുടെ അമരത്ത്. സ്ഥാനമൊഴിഞ്ഞ ബി. അബ്ദുല് നാസറില് നിന്ന് ഉച്ചയോടെയാണ് ജില്ലയുടെ നാല്പ്പത്തിയെട്ടാമത് കളക്ടറായി ചുമതലയേറ്റത്. സബ് കളക്ടര് ചേതന് കുമാര് മീണ, ജില്ലാ വികസന കമ്മിഷണര് ആസിഫ് കെ. യൂസഫ്, അസിസ്റ്റന്റ് കലക്ടര് ഡോ. അരുണ് എസ്. നായര്, എഡിഎം എന്. സാജിതാ ബീഗം, പുനലൂര് ആര്ഡിഒ ബി. ശശികുമാര്, ഡെപ്യൂട്ടി കളക്ടര്മാരായ പി.ആര്. ഗോപാലകൃഷ്ണന്, റോയി കുമാര്, ജയശ്രീ, ബീനാറാണി തുടങ്ങിയവര് സംബന്ധിച്ചു.
2014 ബാച്ച് ഐഎഎസ് ഉദ്യോഗസ്ഥയാണ്. ബിഹാറിലെ മുസാഫിര് ഇന്സ്റ്റിറ്റ്യൂട്ട് ഓഫ് ടെക്നോളജിയില് നിന്ന് എഞ്ചിനീയറിംഗ് ബിരുദം നേടിയിട്ടുണ്ട്. സ്വദേശം ജാര്ഖണ്ഡ് തലസ്ഥാനമായ റാഞ്ചി.
തിരുവനന്തപുരം, മലപ്പുറം ജില്ലകളില് അസിസ്റ്റന്റ് കളക്ടറായി പരിശീലനം പൂര്ത്തിയാക്കി. സബ് കളക്ടറായി പാലക്കാട്, തൃശൂര് ജില്ലകളില് സേവനമനുഷ്ഠിച്ചു. ഒരു വര്ഷമായി എറണാകുളം ജില്ലാ വികസന കമ്മിഷണര്. കൊച്ചി സ്മാര്ട്ട് മിഷന് ലിമിറ്റഡ് ചീഫ് എക്സിക്യുട്ടിവ് ഓഫീസര്, വൈറ്റില മൊബിലിറ്റി ഹബ് മാനേജിംഗ് ഡയറക്ടര്, കൊച്ചി മെട്രോ ട്രാന്സ്പോര്ട്ട് അതോറിറ്റി സിഇഒ എന്നീ നിലകളിലും പ്രവര്ത്തിച്ചിരുന്നു. ചിത്രരചനയിലും പെയിന്റിംഗിലും പഠനകാലത്ത് സംസ്ഥാനതല പുരസ്കാരം നേടിയിട്ടുണ്ട്. സംഗീതവും നൃത്തവുമാണ് ഒഴിവുകാല വിനോദങ്ങള്. എറണാകുളം കളക്ടര് ജാഫര് മാലിക്കാണ് ഭര്ത്താവ്. മകന്: അമാന് മാലിക്.
കൊവിഡ് പ്രതിരോധത്തിന് പ്രഥമ പരിഗണന
കൊവിഡ് പ്രതിരോധത്തിനാണ് പ്രഥമ പരിഗണനയെന്ന് കളക്ടര്. പരമാവധി പേര്ക്ക് വാക്സിന് നല്കാനുള്ള നടപടികള് ഊര്ജ്ജിതമാക്കും. പരിസ്ഥിതിസൗഹൃദ പ്രദേശമാക്കി മാറ്റുന്നതിനൊപ്പം ജില്ലയുടെ ശുചിത്വ പരിപാലനവും ഉറപ്പാക്കും. സാധാരണക്കാരുടെ പ്രശ്നങ്ങള്ക്ക് അതിവേഗം തീര്പ്പുകല്പ്പിക്കാന് ആത്മാര്ത്ഥമായി ശ്രമിക്കും. എല്ലാ വിഭാഗങ്ങളുടേയും പിന്തുണയുണ്ടാകുമെന്നാണ് പ്രതീക്ഷയെന്നും പറഞ്ഞു.
