തൃശൂര് : ഗുരുവായൂരിലെത്തിയ നടന് മോഹന്ലാലിന്റെ കാര് ക്ഷേത്ര നടയ്ക്ക് മുന്നിലേക്ക് കൊണ്ടു വന്നതില് ജീവനക്കാരനെതിരെ നടപടി. താരത്തിന്റെ കാര് ക്ഷേത്ര നടയ്ക്ക് സമീപത്തേയക്ക് കൊണ്ടുവരാനായി ഗേറ്റ് തുറന്നുകൊടുത്ത സെക്യൂരിറ്റി ജീവനക്കാരന് അഡ്മിനിസ്ട്രേറ്റര് കാരണം കാണിക്കല് നോട്ടീസ് നല്കി. മോഹന്ലാലിന്റെ കാര് മാത്രം ക്ഷേത്രത്തിന് സമീപത്തേയക്ക് പ്രവേശിപ്പിക്കാന് എന്തിന അനുമതി നല്കിയെന്ന് ചോദിച്ചാണ് നോട്ടീസ്.
അന്വേഷണ വിധേയായി മൂന്ന് സുരക്ഷാ ജീവനക്കാരനെ ജോലിയില് നിന്നും മാറ്റി നിര്ത്താനും നിര്ദ്ദേശം നല്കിയിട്ടുണ്ട്. എന്ത് കാരണത്താലാണ് മോഹന്ലാലിന്റെ കാര് മാത്രം പ്രവേശിപ്പിച്ചതെന്ന് മൂവരും വ്യക്തമാക്കണം. അതേസമയം രണ്ടു മെമ്പര്മാരടക്കം മൂന്നു ഭരണ സമിതി അംഗങ്ങള് ഒപ്പം ഉള്ളതു കൊണ്ടാണ് ഗേറ്റ് തുറന്നു കൊടുത്തതെന്നാണ് ജീവനക്കാരുടെ വിശദീകരണം നല്കിയിരിക്കുന്നത്.
സാധാരണ പോലീസ് വാഹനങ്ങള് എത്തുന്നിടത്താണ് താരം ക്ഷേത്ര ദര്ശനത്തിനായി വന്നപ്പോള് വാഹനം നിര്ത്തിയത്. അതേസമയം സ്വാധീനമുളളവര്ക്ക് ക്ഷേത്രത്തില് പ്രത്യേക പരിഗണന എന്തുകൊണ്ട് എന്ന് ചോദിച്ച ഹൈക്കോടതി കഴിഞ്ഞ ദിവസം സ്വമേധയാ കേസെടുത്ത പശ്ചാത്തലത്തിലാണ് ഗുരുവായൂര് അധികൃതരുടെ നടപടിയെന്നാണ് സൂചന. പ്രമുഖവ്യവസായി രവി പിള്ളയുടെ മകന്റെ വിവാഹ ചടങ്ങില് പങ്കെടുക്കാനാണ് വ്യാഴാഴ്ച മോഹന്ലാല് ഗുരുവായൂരില് എത്തിയത്.
