കാബൂള്‍: താലിബാന്‍ തീവ്രവാദികള്‍ പിടിച്ചെടുത്ത അഫ്ഗാനിലെ സ്ത്രീകളെയോര്‍ത്ത് ആശങ്കയുണ്ടെന്ന് വിദ്യാഭ്യാസ അവകാശ പ്രവര്‍ത്തകയും താലിബാന്‍ അക്രമണത്തിന് ഇരയുമായ മലാല യൂസഫ്സായ്. രാജ്യത്തെ വെടിനിര്‍ത്തലിനായി അന്താരാഷ്ട്ര സമൂഹം ഇടപെടണമെന്ന് മലാല പറഞ്ഞു. ട്വിറ്ററിലൂടെയാണ് അവര്‍ ഇക്കാര്യം അറിയിച്ചത്.
താലിബാന്‍ രാജ്യത്തിന്റെ നിയന്ത്രണമേറ്റെടുത്തുവെന്ന വാര്‍ത്ത ഞെട്ടലുണ്ടാക്കുന്നതാണ്. സ്ത്രീകള്‍, ന്യൂനപക്ഷങ്ങള്‍, മനുഷ്യാവകാശത്തിനായി പ്രവര്‍ത്തിക്കുന്ന അഭിഭാഷകര്‍ എന്നിവരുടെ സ്ഥിതിയില്‍ ആശങ്കയുണ്ട്. ആഗോള, പ്രാദേശിക ശക്തികള്‍ വെടിനിര്‍ത്തലിനായി ഇടപെടണം. മാനുഷികമായ സഹായങ്ങള്‍ അഫ്ഗാന്‍ ജനതക്ക് ഒരുക്കണം. അഭയാര്‍ഥികളെ സംരക്ഷിക്കണമെന്നും മലാല ആവശ്യപ്പെട്ടു.
സ്ത്രീ വിദ്യാഭ്യാസത്തിനായി പ്രവര്‍ത്തിക്കുന്ന പാകിസ്താന്‍ ആക്ടിവിസ്റ്റും ഫെമിനിസ്റ്റും, ഏറ്റവും പ്രായം കുറഞ്ഞ നൊബേല്‍ സമ്മാന ജേതാവുമാണ് മലാല യൂസഫ്സായ്. അതേസമയം, ഇതുവരെ താലിബാന്‍ ആക്രമണത്തിനെതിരെ വാക്കുകളിലും പ്രവര്‍ത്തികളിലും മുന്‍നിരയില്‍ നിന്ന അഫ്ഗാനിസ്ഥാന്‍ പ്രസിഡന്റ് അഷ്റഫ് ഘാനി നാടുവിട്ടു. അഫ്ഗാനിസ്ഥാന്റെ മുതിര്‍ന്ന ഉദ്യോഗസ്ഥരാണ് ഇക്കാര്യം വെളിപ്പെടുത്തിയത്
2014 മുതല്‍ അഫ്ഗാനിസ്ഥാന്റെ പ്രസിഡന്റായിരുന്നു അഷ്റഫ് ഘാനി. 2019ലെ തെരഞ്ഞെടുപ്പില്‍ അദ്ദേഹം വീണ്ടും തെരഞ്ഞെടുക്കപ്പെട്ടു. ഇദ്ദേഹം അമേരിക്കന്‍ പൗരന്‍ കൂടിയാണ്. ഇദ്ദേഹം എവിടേക്കാണ് രക്ഷപ്പെട്ടതെന്ന് വെളിപ്പെടുത്തിയിട്ടില്ല. മിക്കവാറും അമേരിക്കയില്‍ അഭയം തേടിയിരിക്കുമെന്നാണ് അഭ്യൂഹങ്ങള്‍.
കാബൂള്‍ കൊട്ടാരത്തില്‍ താലിബാനും അഫ്ഗാന്‍ സര്‍ക്കാര്‍ പ്രതിനിധികളും തമ്മില്‍ ചര്‍ച്ച നടക്കുന്നുണ്ട്. തല്‍ക്കാലം താലിബാന്‍ അഫ്ഗാനിസ്ഥാനില്‍ ഇടക്കാലഭരണം പിടിച്ചെടുത്തിരിക്കുകയാണ്. ഞായറാഴ്ച രാവിലെ കാബൂള്‍ നഗരം വളഞ്ഞെങ്കിലും താലിബാന്‍ അക്രമികള്‍ ആക്രമണം നടത്തിയില്ല. ആക്രമണം നടത്തരുതെന്നും തങ്ങളുടെ എംബസി ഉദ്യോഗസ്ഥരെ ആക്രമിക്കരുതെന്നും താലിബാനെ അമേരിക്ക താക്കീത് ചെയ്തിരുന്നു. മാത്രമല്ല, സമാധാനത്തോടെയുള്ള അധികാരക്കൈമാറ്റമാണ് വിദേശരാഷ്‌ട്രങ്ങള്‍ താലിബാനോട് നിര്‍ദേശിച്ചിരിക്കുന്നത്.
പ്രതികരിക്കാൻ ഇവിടെ എഴുതുക: