തിരുവനന്തപുരം: ഫോര്ട്ട് താലൂക്ക് ആശുപത്രിയില് വനിതാ ഡോക്ടറിനെയും സുരക്ഷാ ജീവനക്കാരനെയും മര്ദിച്ച പ്രതികളില് ഒരാള് പിടിയില് കരിമഠം സ്വദേശി റഷീദിനെയാണ് പോലീസ് അറസ്റ്റ് ചെയ്തത്. രണ്ടാം പ്രതിയ്ക്കായി പോലീസ് തെരച്ചില് തുടരുകയാണ്.
ഇന്നലെ രാത്രി 12.30 ഓടെയാണ് സംഭവം. വരിയില് നില്ക്കാന് വിസമ്മതിച്ച പ്രതികള് സുരക്ഷാ ഉദ്യോഗസ്ഥനെ മര്ദിക്കുകയായിരുന്നു. പിന്നാലെ വനിതാ ഡോക്ടറിനേയും മര്ദിച്ചു. മര്ദനമേറ്റ ഇരുവരും തിരുവനന്തപുരം ജനറല് ആശുപ്ത്രിയില് ചികിത്സയിലാണ്.
സഹപ്രവര്ത്തകര്ക്ക് മര്ദനമേറ്റതില് പ്രതിഷേധിച്ച് ആശുപത്രി ജീവനക്കാര് പണിമുടക്കി. ഒ.പി ബഹിഷ്കരിച്ചാണ് സമരം. ക്രമണ വിവരം അറിയിച്ചിട്ടും പൊലീസ് സ്ഥലത്തെത്താന് വൈകിയെന്നും ജീവനക്കാര് ആരോപിക്കുന്നു.
