നെടുങ്കണ്ടം പഞ്ചായത്തിൽ മുൻ ഭരണസമിതിയുടെയും നിലവിലെ ഭരണസമിതിയുടെയും വിവിധ പദ്ധതികളിൽ വ്യാപക ക്രമക്കേട്; വിജിലൻസ് അന്വേഷണം

നെടുങ്കണ്ടം: നെടുങ്കണ്ടം പഞ്ചായത്തിൽ മുൻ ഭരണസമിതിയുടെയും നിലവിലെ ഭരണസമിതിയുടെയും വിവിധ പദ്ധതികളിൽ വ്യാപക ക്രമക്കേട് നടന്നതായുള്ള പരാതിയിൽ വിജിലൻസ് അന്വേഷണം ആരംഭിച്ചു. പ്രാഥമിക പരിശോധനയിൽ കോടികളുടെ അഴിമതി നടന്നതായി  കണ്ടെത്തി.

കഴിഞ്ഞ ദിവസം പഞ്ചായത്തിൽ പരിശോധനക്കെത്തിയ വിജിലൻസ് സംഘം വിവിധ പദ്ധതികളുടെ രേഖകൾ പിടിച്ചെടുത്തു. അന്വേഷണത്തിന്റെ ഭാഗമായി പഞ്ചായത്ത് സെക്രട്ടറിയുടെ മൊഴി രേഖപ്പെടുത്തി. കെട്ടിടങ്ങൾക്ക് പെർമിറ്റ് അനുവദിക്കൽ, റോഡ് നിർമാണം, നികുതി പരിവ്, കമ്പ്യൂട്ടർ അടക്കമുള്ള ഉപകരണങ്ങളിൽ കാട്ടിയ തിരിമറി എന്നിവയാണ് വിജിലൻസ് പരിശോധിക്കുന്നത്.

2018 മുതൽ പഞ്ചായത്തിൽ നടന്ന വിവിധ പ്രവർത്തികളിലും പദ്ധതികളിലുമാണ് വ്യാപക ക്രമക്കേട് നടന്നതായി പരാതി ഉയർന്നത്. പഞ്ചായത്ത് ഡയറക്ടർക്കും വിജിലൻസിനും ലഭിച്ച പരാതികളെതുടർന്ന് നടത്തിയ അന്വേഷണത്തിലാണ് കോടികളുടെ അഴിമതി നടന്നതായുള്ള കണ്ടെത്തലുള്ളത്. പഞ്ചായത്തിൽ അനധികൃതമായി നിരവധി കെട്ടിടങ്ങൾക്ക് പെർമിറ്റ് അനുവദിച്ചെന്നുള്ള പരാതിയിൽ പരാതിക്കാരുടെയും ജീവനക്കാരുടേയും ആരോപണവിധേയരായവരുടെയും മൊഴികൾ രേഖപ്പെടുത്തി. കഴിഞ്ഞ 20-ന് വിജിലൻസ് സംഘം നെടുങ്കണ്ടത്തെത്തി പരാതി ഉയർന്ന കെട്ടിടങ്ങൾ നേരിട്ട് പരിശോധിച്ചിരുന്നു. ഇതിൽ നാല് കെട്ടിടങ്ങൾക്ക് അനധികൃതമായി പെർമിറ്റ് നൽകിയതായാണ് പ്രാഥമിക കണ്ടെത്തൽ.

2018-19 വർഷം നൂറുശതമാനം നികുതി പിരിച്ചെടുത്ത പഞ്ചായത്ത് എന്നുള്ള ബഹുമതി നേടുന്നതിനായി വ്യാപക ക്രമക്കേട് പഞ്ചായത്ത് സെക്രട്ടറിയുടെയും ജീവനക്കാരുടെ നേതൃത്വത്തിൽ നടന്നുവെന്നുള്ളതാണ് മറ്റൊരു പരാതി. ജനങ്ങളിൽ നിന്നും നേരിട്ട് സ്വീകരിക്കേണ്ട നികുതി കൃതൃമമായി ചെക്കിലൂടെ വാങ്ങി ക്രമക്കേട് നടത്തി സർക്കാരിനെ തെറ്റിദ്ധരിപ്പിച്ചുവെന്നാണ് പരാതി. സംഭവത്തിൽ പഞ്ചായത്ത് ഡെപ്യൂട്ടി ഡയറക്ടർ അന്വേഷണം നടത്തി ജീവനക്കാർക്ക് മുമ്പ് മെമ്മോ നൽകിയിരുന്നു. ഇതിലും വിജിലൻസ് അന്വേഷണം പുരോഗമിക്കുകയാണ്.

83 റോഡുകളുടെ നിർമാണത്തിൽ, ആവശ്യമായ അര ഇഞ്ച്, ഒരിഞ്ച് മെറ്റൽ, എംസാൻഡ് എന്നിവയിൽ വ്യാപകമായി കൃത്രിമം നടത്തി. പകരം പാറപ്പൊടി ഉപയോഗിച്ചാണ് മിക്ക റോഡുകളും ടാറിങ് ജോലികൾ പൂർത്തീകരിച്ചത്. ഇതിൽ മാത്രം കോടികളുടെ അഴിമതിയാണ് നടന്നതെന്നാണ് ആരോപണം.  കെമിക്കൽ പരിശോധനയ്‌ക്കായി വിജിലൻസ് ശേഖരിച്ച റോഡിന്റെ സാമ്പിളുകൾ അടുത്ത ദിവസം പരിശോധനക്ക് വിധേയമാക്കും.

പഞ്ചായത്തിലെ കമ്പ്യൂട്ടർ റൂമിൽ വ്യാജമായി തീപിടുത്തം ഉണ്ടാക്കി ഉപകരണങ്ങൾ പൂർണമായും മാറ്റി പുതിയത് വാങ്ങിയെന്നും ആരോപണമുണ്ട്. പുതിയ ഉപകരണങ്ങൾ എത്തിച്ചപ്പോൾ പഴയവ സെക്രട്ടറിയും ജീവനക്കാരും കടത്തിയതായാണ് ആക്ഷേപം. പിടിച്ചെടുത്ത രേഖകൾ കൂടാതെ വിജിലൻസ് ആവശ്യപ്പെട്ടിരിക്കുന്ന മറ്റ് രേഖകൾ ബുധനാഴ്ച സമർപ്പിക്കുവാൻ നിർദ്ദേശിച്ചിട്ടുണ്ട്. സംഭവത്തിൽ  പഞ്ചായത്ത് സെക്രട്ടറിയെ വിളിച്ചുവരുത്തി കഴിഞ്ഞദിവസം മൊഴിയെടുത്തിരുന്നു. മുൻ ഭരണസമിതി അംഗങ്ങൾ, നിലവിലെ അംഗങ്ങൾ, പഞ്ചായത്ത് ജീവനക്കാർ എന്നിവരുടെ മൊഴി വരുംദിവസങ്ങളിൽ രേഖപ്പെടുത്തുമെന്നാണ് വിവരം.