ന്യൂദല്ഹി: കേരളത്തില് സംസ്ഥാനസര്ക്കാര് ഉത്തരവിന്റെ മറവില് കോടിക്കണക്കണക്കിനു രൂപയുടെ വനം കൊള്ള നടത്തിയ സംഭവത്തില് കേന്ദ്രം ഇടപെടുന്നു. കേന്ദ്ര വനം-പരിസ്ഥിതി മന്ത്രി ഭൂപേന്ദ്രയാദവുമായും ദേശീയ പട്ടികജാതി കമ്മീഷന് ചെയര്മാനുമായും ബിജെപി സംസ്ഥാന നേതൃത്വം ഇന്ന് കൂടിക്കാഴ്ച നടത്തും. വനം കൊള്ളയടിച്ച് പട്ടികവര്ഗ്ഗക്കാരെ വഞ്ചിക്കുകയും കള്ളക്കേസ്സെടുക്കുകയും ചെയ്യുന്ന ഇടതുസര്ക്കാര് നടപടിക്കെതിരെ ദേശീയ പട്ടിക വര്ഗ കമ്മീഷന് ചെയര്മാന് ബിജെപി സംസ്ഥാന നേതൃത്വം ഇന്നലെ പരാതി നല്കി. കമ്മീഷന്റെ അടിയന്തര ഇടപെടല് ആവശ്യപ്പെട്ടുകൊണ്ടാണ് ബിജെപി സംസ്ഥാന അധ്യക്ഷന് കെ. സുരേന്ദ്രന്റെ നേതൃത്വത്തില് ബിജെപി നേതാക്കള് ദേശീയ പട്ടികവര്ഗ കമ്മീഷന് ചെയര്മാന് ഹര്ഷ് ചൗഹാനെ സന്ദര്ശിച്ചത്.
വയനാട്ടിലും അട്ടപ്പാടിയിലും ഇടുക്കിയിലുമടക്കം പട്ടികവര്ഗ്ഗക്കാര് നേരിടുന്ന പ്രശ്നങ്ങള് സുരേന്ദ്രനും നേതാക്കളും അദ്ദേഹത്തിന്റെ ശ്രദ്ധയില്പ്പെടുത്തി. മുട്ടില് മരംമുറിയില് സംസ്ഥാന സര്ക്കാര് ആദിവാസികളെ ബലിയാടുകളാക്കുകയാണെന്ന് പരാതിയില് പറയുന്നു. ലക്ഷങ്ങള് വിലയുള്ള മരങ്ങള് ആദിവാസികളെ തെറ്റിദ്ധരിപ്പിച്ച് നിസാര തുകയ്ക്ക് തട്ടിയെടുത്തതിന് ശേഷം അവര്ക്ക് നേരെ നിയമ നടപടിക്കൊരുങ്ങുകയാണ് സര്ക്കാരെന്നും കമ്മീഷന്റെ അടിയന്തര ഇടപെടല് ഉണ്ടാകണമെന്നും ബിജെപി ആവശ്യപ്പെട്ടു.
മുന് സംസ്ഥാന അധ്യക്ഷന് കുമ്മനം രാജശേഖരന്, സംസ്ഥാന ജനറല് സെക്രട്ടറി പി. സുധീര്, പട്ടികജാതി മോര്ച്ച സംസ്ഥാന പ്രസിഡന്റ് ഷാജുമോന് വട്ടേക്കാട് എന്നിവരും സന്നിഹിതരായിരുന്നു.
ജന്മഭൂമി ഓണ്ലൈന്