അമ്പലപ്പുഴ : തോട്ടപ്പള്ളിയില് ഒറ്റപ്പെട്ടു കഴിയുന്ന വൃദ്ധ ദമ്പതികളുടെ വീടിനു നേരേ സാമൂഹ്യ വിരുദ്ധരുടെ അക്രമണം.വളര്ത്തുനായയുടെ കാല് തല്ലി ഒടിച്ചു. പുറക്കാട് പഞ്ചായത്ത് തോട്ടപ്പള്ളി സന്ധ്യാ ഭവനില് ചന്ദ്രിക – സുധാകരന് ദമ്പതികളുടെ വീടിനു നേരേയാണ് കഴിഞ്ഞ ദിവസം രാത്രിയോടെ അക്രമം ഉണ്ടായത്. ഇതിനു മുന്പും ഈ വീടിനു നേരെ നിരവധി തവണ അക്രമം നടന്നിട്ടുള്ളതായി കാണിച്ച് ചന്ദ്രിക അമ്പലപ്പുഴ പോലീസില് പരാതി നല്കി.
ഏതാനും വര്ഷം മുന്പ് ഗര്ഭിണിയായ പശുവിന് വൈക്കോലില് വിഷം കലര്ത്തി കൊന്നു. തുടര്ന്ന് ഏതാനും മാസങ്ങള്ക്കു ശേഷം ആട്ടിന്കുട്ടിയെ കഴുത്തില് കയര് മുറുക്കി കൊല്ലുകയും വീടിന്റെ വാതില് തകര്ക്കകയും ചെയ്തു. സമീപത്തെ ആളൊഴിഞ്ഞ വീട്ടില് തമ്പടിക്കുന്ന സാമൂഹ്യ വിരുദ്ധരാണ് അക്രമത്തിന് നേതൃത്വം നല്കുന്നതെന്നും പരാതിയില് പറയുന്നു. മൂന്നു പെണ്മക്കളെ വിവാഹം ചെയ്ത് അയച്ച ശേഷം ഇവര് രണ്ടു പേരും മാത്രമാണ് വീട്ടില് താമസിക്കുന്നത്.
