വണ്ടിപ്പെരിയാര്: ആറ് വയസുകാരിയെ പീഡിപ്പിച്ച് കൊന്ന കേസിലെ പ്രതി അര്ജുന് അശ്ലീല വീഡിയോകള്ക്ക് അടിമയാണെന്നും അമിത ലൈംഗികാസക്തി പ്രകടിപ്പിച്ചിരുന്നുവെന്നും പോലീസിനോട് സമ്മതിച്ചു. മരിച്ച പെണ്കുട്ടിയുടെ വീടിന് അടുത്ത മുറിയിലായിരുന്നു താമസം. മാതാപിതാക്കളും സമീപത്തുള്ളവരും രാവിലെ ജോലിക്ക് പോകുന്ന സമയത്തായിരുന്നു പീഡനം. കുട്ടിയെ പ്രകൃതി വിരുദ്ധ പീഡനത്തിനും ഉപയോഗിച്ചിരുന്നു.
ബോധരഹിതയായ കുട്ടിയുടെ ഷാള് അലമാരയില് നിന്നെടുത്ത് കഴുത്തില് കെട്ടി പൊക്കിത്തൂക്കുകയായിരുന്നു. വാതില് അകത്ത് നിന്ന് പൂട്ടിയ ശേഷം കമ്പിയില്ലാത്ത ജനല് വഴി പുറത്തേക്ക് രക്ഷപ്പെട്ടു. പെണ്കുട്ടിയുടെ ദേഹത്ത് നിന്ന് പ്രതിയുടെ രോമങ്ങള് ലഭിച്ചിട്ടുണ്ട്.
കുട്ടിയെ കെട്ടിത്തൂക്കിയ ശേഷം ഒന്നും സംഭവിക്കാത്ത പോലെ വീട്ടിലെത്തിയ പ്രതി പെണ്കുട്ടിയുടെ സഹോദരന് കരഞ്ഞുവിളിച്ചെത്തിയപ്പോള് നാട്ടുകാര്ക്കൊപ്പം മരണ വീട്ടിലെത്തി. കുട്ടിയുടെ സംസ്കാര ചടങ്ങു വരെ ഒപ്പമുണ്ടായിരുന്നതായും മരണവീട്ടില് വന്ന് കുട്ടിയുടെ അച്ഛനെ കെട്ടിപ്പിടിച്ച് പൊട്ടിക്കരഞ്ഞതായും അയല്വാസികള് പറഞ്ഞു. ഡിവൈഎഫ്ഐ നേതാവായ അര്ജുന് പെണ്കുട്ടിയുടെ വീട്ടില് പ്രതിക്ക് ആവശ്യത്തിലധികം സ്വാതന്ത്ര്യമുണ്ടായിരുന്നു.
ഏറെക്കാലമായി പെണ്കുട്ടി ഇയാളുടെ പീഡനത്തിന് ഇരയായിരുന്നു. കഴിഞ്ഞ 30നാണ് ആറ് വയസ്സുകാരിയെ ഷാള് കഴുത്തില് കുരുങ്ങി മരിച്ച നിലയില് കണ്ടെത്തിയത്. പീഡനത്തിനിടെ ബോധരഹിതയായ കുട്ടിയെ മരിച്ചെന്ന ധാരണയില് അര്ജുന് വീട്ടിലെ അടുക്കളയില് പഴക്കുല തൂക്കാന് ഉപയോഗിച്ചിരുന്ന കയറിന്റെ അറ്റത്തുള്ള ഹുക്ക് പോലുള്ള പ്ലാസ്റ്റിക്ക് വള്ളിയില് ഷാള് കെട്ടി തൂക്കുകയായിരുന്നു. കളിക്കുന്നതിനിടെ അബദ്ധത്തില് ഷാള് കഴുത്തില് കുരുങ്ങി മരിച്ചതാണെന്നാണ് ആദ്യം കരുതിയത്. പോസ്റ്റുമോര്ട്ടത്തില് ക്രൂരമായ പീഡനത്തിനിരയായെന്ന് തെളിയുകയായിരുന്നു.
ഇതോടെയാണ് അന്വേഷണം അയല്വാസികളിലേക്ക് നീങ്ങിയത്. അര്ജുന് നാളുകളായി കുട്ടിയെ ലൈംഗികമായി ചൂഷണം ചെയ്തു വരികയായിരുന്നെന്ന മൊഴി നല്കിയിട്ടുണ്ട്. കൊലപാതകം, പോക്സോ, പീഡനം എന്നീ വകുപ്പുകള് ചുമത്തിയാണ് അര്ജുനെ അറസ്റ്റ് ചെയ്തിരിക്കുന്നത്. പീരുമേട് ഡിവൈഎസ്പി സി.ജി. സനില്കുമാര്, വണ്ടിപ്പെരിയാര് സിഐ ടി.ഡി. സുനില്കുമാര്, എസ്ഐ ഇ.പി. ജോയി എന്നിവരുടെ നേതൃത്വത്തിലാണ് ദിവസങ്ങള്ക്കുള്ളില് പ്രതിയെ അറസ്റ്റ് ചെയ്തത്.
അതേസമയം നാട്ടുകാരുടെ ശക്തമായ പ്രതിഷേധത്തിനിടെ പ്രതിയെ കനത്ത പോലീസ് കാവലില് സംഭവ സ്ഥലത്തെത്തിച്ച് തെളിവെടുത്തു. വൈകിട്ടോടെ കോടതിയില് ഹാജരാക്കിയ പ്രതിയെ റിമാന്ഡ് ചെയ്തു. കേസില് കൂടുതല് അന്വേഷണത്തിനായി പ്രതിയെ കസ്റ്റഡിയില് വാങ്ങാനുള്ള തയാറെടുപ്പിലാണ് വണ്ടിപ്പെരിയാര് പോലീസ്.
