പാലക്കാട്: നടനും എംഎല്‍എയുമായ മുകേഷിനെ ഫോണ്‍ ചെയ്തതിനു ശകാരം ഏറ്റുവാങ്ങിയ വിദ്യാര്‍ത്ഥിയെ കണ്ടെത്തി. ഒറ്റപ്പാലം മീറ്റ്ന സ്വദേശി സിഐടിയു പ്രവര്‍ത്തകനായ നാരായണന്റെ മകന്‍ വിഷ്ണുവാണ് വിദ്യാര്‍ത്ഥി. പത്താം ക്ലാസ് വിദ്യാര്‍ഥിയായ കുട്ടി സുഹൃത്തിന്റെ ഓണ്‍ലൈന്‍ പഠനത്തിന് സഹായം തേടിയാണ് മുകേഷിനെ വിളിച്ചത്. വാട്ടസ്ആപ്പ് ഗ്രൂപ്പില്‍ കണ്ട കൊല്ലംകാരനായ ഒരു വിദ്യാര്‍ത്ഥിക്ക് മൊബൈല്‍ ലഭ്യമാക്കാനാണ് മുകേഷിനെ വിളിച്ചത്.
സംഭവം വിവാദമായതോടെ ഇന്നു രാവിലെ കുട്ടിയേയും പിതാവിനേയും സിപിഎം പാര്‍ട്ടി ഓഫിസിലേക്ക് മാറ്റി. പിന്നീട് മാധ്യമങ്ങളോട് പറയേണ്ടത് പറഞ്ഞുപഠിപ്പിച്ചു. താന്‍ മൂന്നു തവണ മുകേഷിനെ വിളിച്ചെന്നും അപ്പോള്‍ മുകേഷ് തിരിച്ചു വിളിച്ചു പിന്നീട് വിളിക്കാം തിരക്കാണെന്നു പറഞ്ഞെന്നും വിഷ്ണു. എന്നാല്‍, വീണ്ടു മൂന്നു തവണ വിളിച്ചപ്പോഴാണ് ഇത്തരത്തില്‍ മുകേഷ് സംസാരിച്ചത്. അതില്‍ തനിക്ക് ഒരു വിഷമവും ഇല്ലെന്നും സിനിമ നടനായതു കൊണ്ട് ഒരു കൗതുകത്തിനാണ് ഫോണ്‍ റെക്കോര്‍ഡ് ചെയ്തത്. ഒരു സുഹൃത്തിനു മാത്രമാണ് സംഭാഷണം അയച്ചു കൊടുത്തത്. അല്ലാതെ സോഷ്യല്‍മീഡിയയില്‍ ഇട്ടിട്ടില്ലെന്നും വിഷ്ണു. മുന്‍എംഎല്‍എ ഹംസയുടെ നേതൃത്വത്തിലാണ് കുട്ടിയേയും പിതാവിനേയും പാര്‍ട്ടി ഓഫിസില്‍ എത്തിച്ചത്. വി.കെ.ശ്രീകണ്ഠന്‍ എംപി സന്ദര്‍ശിച്ചതിന് പിന്നാലെ കുട്ടിയെ സിപിഎം ലോക്കല്‍ കമ്മിറ്റി ഓഫീസിലേക്ക് മാറ്റിയത്.
അതേസമയം, സജീവ സിപിഎം പ്രവര്‍ത്തകന്റെ മകനും ബാലസംഘം പ്രവര്‍ത്തകനുമാണ് വിഷ്ണുവെന്ന് പാര്‍ട്ടി നേതൃത്വം വ്യക്തമാക്കി. ഇതോടെ വിഷയത്തില്‍ രാഷ്‌ട്രീയ ആരോപണം നടത്തിയ മുകേഷ് വെട്ടിലായിരിക്കുകയാണ്. തന്നെ വേട്ടയാടുന്നതിന്റെ ഭാഗമാണ് ഫോണ്‍ വിളിയെന്നായിരുന്നു മുകേഷിന്റെ ആരോപണം.
മുകേഷിന്റെ വിശദീകരണം ഇത്തരത്തിലായിരുന്നു. ”നിയമസഭാ തെരഞ്ഞെടുപ്പിന് ശേഷം നിരന്തരമായ വേട്ടയാടലാണ് ഞാന്‍ അനുഭവിക്കുന്നത്. ആരെക്കെയോ തുടര്‍ച്ചയായി ഫോണില്‍ വിളിച്ചുകൊണ്ടിരിക്കുകയാണ്. ചാര്‍ജ് ചെയ്താല്‍ മുക്കാല്‍ മണിക്കൂര്‍ കൊണ്ട് തീരുന്ന അവസ്ഥയാണ്. അവരെ വിളിക്കുന്നത് നിസാര കാര്യങ്ങള്‍ പറഞ്ഞാണ്. കാര്യമില്ലാത്ത കാര്യങ്ങള്‍ക്ക്. ട്രെയിന്‍ മിസായി പോയി, കറന്റ് പോയി അങ്ങനെ പല പല സ്ഥലങ്ങളില്‍ നിന്നു വിളിക്കുന്ന സാഹചര്യമായിരുന്നു. ഇത് പ്ലാന്‍ ചെയ്ത് നടപ്പാക്കുന്നതാണ്. എന്നെ പ്രകോപിപ്പിക്കാനായിരുന്നു ശ്രമം. ഇത്രയും നാളായി അവര്‍ക്കതില്‍ വിജയിക്കാന്‍ കഴിഞ്ഞിരുന്നില്ല. ഇത്തവണത്തെയും പ്ലാനിന്റെ ഭാഗമായിരുന്നു.
ഞാന്‍ ഒരു സുപ്രധാനമായ സൂം മീറ്റിംഗിലായിരുന്നു. തുടര്‍ച്ചയായി വിളിച്ചപ്പോള്‍, ഫോണ്‍ എടുത്തിട്ട് അങ്ങോട്ട് വിളിക്കാമെന്ന് പറഞ്ഞു. ആറു തവണ വിളിച്ചു. ഇതിനിടെ സൂം കട്ടായി പോയി. തുടര്‍ന്ന് കുട്ടിയോട് പറഞ്ഞു, അത്യാവശ്യ മീറ്റിംഗില്‍ ആയിരുന്നെന്ന്. സ്വന്തം എംഎല്‍എയെ വിളിക്കൂ, ശേഷം അദ്ദേഹം എന്ത് പറയുന്നെന്ന് നോക്കിയിട്ട് എന്നെ വിളിക്കൂ, ശേഷം മുന്നോട്ടു പോകാമെന്ന് പറഞ്ഞു. പത്താം ക്ലാസില്‍ പഠിക്കുന്ന വിദ്യാര്‍ഥി സ്വന്തം മണ്ഡലത്തിലെ എംഎല്‍എയെ അറിഞ്ഞിരിക്കണം.
അവന്‍ എന്നോട് പറഞ്ഞത് സുഹൃത്ത് വിളിക്കാന്‍ പറഞ്ഞിട്ടാണ് വിളിച്ചതെന്ന്. എന്ന് പറഞ്ഞാല്‍ അത് സുഹൃത്ത് അല്ല. അത് ശത്രുവാണ്. അത് ആ മോന്റെ മാത്രമല്ല, നാടിന്റെ. കുട്ടികളെ ഉപയോഗിച്ച് ഫോണില്‍ വിളിക്കുക, അത് റെക്കോര്‍ഡ് ചെയ്യുക എന്നതാണ് രീതി.
എന്നെ ഉപദ്രവിക്കാനാണ് ശ്രമിക്കുന്നത്. ചൂരല്‍ വച്ച് അടിക്കുമെന്ന് പറഞ്ഞത് ആലങ്കാരികമായിട്ടാണ്. പത്താം ക്ലാസില്‍ പഠിക്കുന്ന സ്വന്തം എംഎല്‍എയെ അറിഞ്ഞിരിക്കണം. ആസുത്രീതമായ അക്രമമാണ് നടന്നത്. പക്ക രാഷ്‌ട്രീയം. ഇത് ജനങ്ങള്‍ വിശ്വാസിക്കരുത്. വിഷയത്തില്‍ പൊലീസ് പരാതി നല്‍കാന്‍ പോകുകയാണ്. ഇതിന് പിന്നില്‍ പ്രവര്‍ത്തിച്ചവരെ നിയമത്തിന് മുന്നില്‍ കൊണ്ടുവരണം.
ഇവര്‍ ആ കോളിന് മുന്‍പ് പറഞ്ഞ കാര്യങ്ങള്‍ എന്തുകൊണ്ടാണ് പുറത്തുവിടാത്തത്. ഇതിന് പിന്നില്‍ ആരൊക്കെയാണെന്ന് ഊഹിക്കാന്‍ പറ്റും. കുട്ടികള്‍ ശ്രദ്ധിക്കണം. ഇങ്ങനെ ആരെയും വിളിക്കരുത്. അവര്‍ വഴി തെറ്റിക്കാനാണ് ശ്രമിക്കുന്നത്. ഈ സംഭവത്തില്‍ മോനെക്കാള്‍ വിഷമം എനിക്കുമുണ്ട്.’
പ്രതികരിക്കാൻ ഇവിടെ എഴുതുക: