തിരുവനന്തപുരം: മരംമുറി അന്വേഷണസംഘത്തിലെ ഉദ്യോഗസ്ഥനെ മാറ്റിയതില്‍ ഉന്നത ഉദ്യോഗസ്ഥര്‍ക്കെതിരെ വനം വകുപ്പ് മന്ത്രി എ.കെ. ശശീന്ദ്രന്‍. വനംവകുപ്പിലെ ഉദ്യോഗസ്ഥരെല്ലാം നല്ലവരാണെന്ന് താന്‍ പറയുന്നില്ല. എന്നാല്‍ അന്വേഷണ സംഘത്തിലെ മാറ്റം അറിഞ്ഞപ്പോള്‍ തന്നെ താന്‍ അത് തിരുത്തിയെന്നും ശശീന്ദ്രന്‍ പറഞ്ഞു.
മുട്ടില്‍ വനംകൊള്ള കേസിലെ ഉത്തരവിലുണ്ടായ പാകപ്പിഴ കളക്ടര്‍മാര്‍ അറിയിച്ചിരുന്നതാണ്. റവന്യൂ ഭൂമിയില്‍ നിന്നാണ് മരംമുറി നടന്നിരിക്കുന്നതെന്നാണ് ഇതുവരെ ലഭിച്ചിരിക്കുന്ന വിവരം. വനംവകുപ്പ് ഉദ്യോഗസ്ഥര്‍ ഇക്കാര്യത്തില്‍ തെറ്റായി പ്രവര്‍ത്തിച്ചിട്ടുണ്ടോ എന്ന് അന്വേഷിക്കുന്നുണ്ട്. കൊള്ളയ്ക്ക് കൂട്ടുനിന്നവരെ ശിക്ഷിക്കാനുള്ള നടപടികള്‍ സ്വീകരിക്കും. സത്യസന്ധത ബോധ്യപ്പെട്ടിട്ടും ആക്ഷേപങ്ങള്‍ ഉന്നയിക്കുന്നത് ദൗര്‍ഭാഗ്യകരമാണെന്നും അദ്ദേഹം പറഞ്ഞു.
ഒക്ടോബര്‍ 24നു ശേഷം പട്ടയഭൂമികളില്‍ പലതും നടന്നതായി കളക്ടര്‍മാര്‍ അറിയിച്ചു. ഉത്തരവിന്റെ അന്തസത്ത പാലിച്ചായിരുന്നില്ല നടപടികള്‍. പല ഉദ്യോഗസ്ഥരും അവരവരുടെ സൗകര്യത്തിനനുസരിച്ച് ഉത്തരവ് വ്യാഖ്യാനിച്ചു. സര്‍ക്കാരോ ഉദ്യോഗസ്ഥരോ ഇത്തരം രീതിയില്‍ മരംവെട്ടുമെന്ന് അറിഞ്ഞിട്ടുണ്ടാവില്ല.
സര്‍ക്കാരിന്റെ ആദ്യകാലത്ത് തന്നെ സര്‍ക്കാരിന് വനംകൊള്ളയുമായി ബന്ധമുണ്ടെന്ന് വരുത്തിതീര്‍ക്കാനുള്ള ശ്രമമാണ് ഇപ്പോള്‍ നടക്കുന്നത്. വനഭൂമിയില്‍ നിന്ന് ഒരടിനീളമുള്ള വൃക്ഷം പോലും നഷ്ടപ്പെട്ടിട്ടില്ല. റവന്യൂകേസില്‍ ഇപ്പോള്‍ ഒരു അന്വേഷണം നടത്തിക്കൊണ്ടിരിക്കുകയാണ്. ആ അന്വേഷണത്തിന്റെ നിഗമനങ്ങള്‍ തൃപ്തികരമല്ലെങ്കില്‍ മറ്റൊരു അന്വേഷണത്തിലേക്ക് പോകുന്നത് ആലോചിക്കും. ഉദ്യോഗസ്ഥരുടെ സാമ്പത്തികവശങ്ങളടക്കം അന്വേഷിക്കും. അന്വേഷണം കാലതാമസമെടുക്കുമെങ്കില്‍ വേഗത്തിലാക്കാനുള്ള നടപടികള്‍ കൈക്കൊള്ളുമെന്നും മന്ത്രി കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: