കൊച്ചി: രാഷ്ട്രീയ സ്വയംസേവക സംഘത്തെ തകര്‍ക്കുകയെന്ന സിപിഎമ്മിന്റെ രാഷ്ട്രീയ അജണ്ടയാണ് കൊടകര കവര്‍ച്ചക്കേസ് അന്വേഷിക്കുന്ന പ്രത്യേക സംഘം നടപ്പാക്കുന്നതെന്ന് ആര്‍എസ്എസ്. കവര്‍ച്ചയ്‌ക്ക് പിന്നിലെ യഥാര്‍ത്ഥ വസ്തുതകള്‍ പുറത്ത് കൊണ്ടുവരുന്നതിന് പകരം സംഭവവുമായി യാതൊരു ബന്ധവുമില്ലാത്തവരെ മനപ്പൂര്‍വം അപകീര്‍ത്തിപ്പെടുത്താനാണ് ശ്രമം നടക്കുന്നത്.
ആര്‍എസ്എസിനെ ബന്ധപ്പെടുത്തി വാര്‍ത്തകള്‍ ചമയ്‌ക്കാന്‍ കേസന്വേഷണത്തിന്റെ തുടക്കം മുതല്‍ ശ്രമം നടന്നു. ‘കവര്‍ച്ചക്കേസിന് ആര്‍എസ്എസ് ബന്ധം’, ‘ആര്‍എസ്എസ് നേതാക്കളെ ചോദ്യം ചെയ്യാന്‍ നീക്കം’ തുടങ്ങിയ വാര്‍ത്തകള്‍ ഒരു വിഭാഗം മാധ്യമങ്ങള്‍ ബോധപൂര്‍വ്വം പ്രചരിപ്പിക്കുകയായിരുന്നു. അന്വേഷണ സംഘത്തെ ഉദ്ധരിച്ചാണ് തികച്ചും തെറ്റായ ഇത്തരം വാര്‍ത്തകള്‍ പ്രചരിപ്പിച്ചത്. അന്വേഷണത്തെ പ്രചരണായുധമാക്കാനും വഴിതിരിച്ച് വിടാനും ദേശീയ പ്രസ്ഥാനങ്ങളെ ജനമധ്യത്തില്‍ അപകീര്‍ത്തിപ്പെടുത്താനുമുള്ള സംഘടിത ശ്രമത്തെ ആര്‍എസ്എസ് പ്രാന്ത കാര്യകാരി പ്രസ്താവനയില്‍ ശക്തിയായി അപലപിച്ചു.
ആര്‍എസ്എസിന്റെ ആദര്‍ശ ശുദ്ധിയിലും സുതാര്യവും സത്യസന്ധവുമായ പ്രവര്‍ത്തനശൈലിയിലും വിശ്വാസമുള്ള പൊതുസമൂഹത്തില്‍ തെറ്റിദ്ധാരണ പടര്‍ത്താനുള്ള ആസൂത്രിതമായ ഗൂഢപദ്ധതിയാണ് ഇതിന് പിന്നില്‍. ഭരണാധികാരത്തിന്റെ ബലമുപയോഗിച്ച് ദേശീയ ശക്തികളെ തളര്‍ത്താനും തകര്‍ക്കാനും സിപിഎം എക്കാലവും ശ്രമിച്ചിട്ടുണ്ട്. പോലീസിനെ സിപിഎമ്മിന്റെ രാഷ്ട്രീയ ഉപകരണമായി മാറ്റിയിരിക്കുകയാണ്.
കൊടകര സംഭവവുമായി ആര്‍എസ്എസിന് യാതൊരു ബന്ധവുമില്ല. കേസന്വേഷണത്തിന്റെ മറവില്‍ ആര്‍എസ്എസിന്റെ പ്രതിച്ഛായ നശിപ്പിക്കാനുള്ള ശ്രമം പോലീസ് അവസാനിപ്പിക്കണം. സംഭവത്തിന് പിന്നിലെ യഥാര്‍ത്ഥ വസ്തുതകള്‍ പുറത്തുകൊണ്ട് വരാന്‍ സത്യസന്ധമായ അന്വേഷണം നടക്കണം. ആര്‍എസ്എസിനെതിരെ വ്യാജവാര്‍ത്തകള്‍ പ്രചരിപ്പിക്കുന്ന ഒരു വിഭാഗം മാധ്യമങ്ങള്‍ സംഘടിത ശ്രമത്തില്‍ നിന്ന് പിന്തിരിയണം. ഇടതു സര്‍ക്കാരും മാധ്യമങ്ങളും പോലീസും നടത്തുന്ന ഇത്തരം കുത്സിത ശ്രമങ്ങള്‍ക്കെതിരെ ജനാധിപത്യ രീതിയില്‍ പ്രതികരിക്കാന്‍ പൊതുസമൂഹം മുന്നോട്ട് വരണമെന്നും പ്രാന്ത കാര്യകാരി അഭ്യര്‍ത്ഥിച്ചു.
പ്രതികരിക്കാൻ ഇവിടെ എഴുതുക: