അബൂജ: നൈജീരിയയിലെ കൊടും ഭീകരസംഘടന ബൊക്കോ ഹറാമിന്റെ തലവന്‍ അബൂബക്കര്‍ സെഖാവോ കൊല്ലപ്പെട്ടു. ഭീകരന്റെ അന്ത്യം സ്ഥിരീകരിച്ച് ഇസ്ലാമിക് സ്റ്റേറ്റ് വെസ്റ്റ് ആഫ്രിക്ക പ്രോവിന്‍സ് (ഐഎസ്ഡബ്ല്യുഎപി) സന്ദേശം പുറത്തുവിട്ടു. .
ബൊക്കോ ഹറാമും ഐഎസ്ഡബ്ല്യുഎപിയും തമ്മില്‍ ഇപ്പോള്‍ ഏറ്റുമുട്ടലിലാണ്. ഇരു ഭീകരസംഘടനകളും മേയ് 18നു തമ്മില്‍ നടത്തിയ പോരാട്ടത്തില്‍, ബോംബ് പൊട്ടിത്തെറിച്ചാണ് അബൂബക്കര്‍ മരിച്ചതെന്നു സന്ദേശത്തില്‍ പറയുന്നു.
അതേസമയം, സ്‌ഫോടക വസ്തു പൊട്ടിച്ച് അബൂബക്കര്‍ സെഖാവോ സ്വയം ജീവനൊടുക്കിയതാണെന്നു പ്രാദേശികമാധ്യമങ്ങളും റിപ്പോര്‍ട്ട് ചെയ്യുന്നുണ്ട്. എന്നാല്‍, അബൂബക്കര്‍ സെഖാവോ കൊല്ലപ്പെട്ടതായുള്ള വാര്‍ത്തകള്‍ മുന്‍പും പുറത്തുവന്നതിനാല്‍ വാര്‍ത്തകള്‍ സ്ഥിരീകരിക്കാന്‍ നൈജീരിയന്‍ സൈന്യം തയ്യാറായിട്ടില്ല. അന്വേഷണം നടത്തുമെന്നാണ് സൈന്യത്തിന്റെ അഭിപ്രായമെന്ന് ബിബിസി റിപ്പോര്‍ട്ട് ചെയ്തു. എന്താണ് സംഭവിച്ചതെന്ന് സൈന്യം അന്വേഷിക്കുകയാണെന്ന് കരസേന വക്താവ് ബ്രിഗ് ജനറല്‍ മുഹമ്മദ് യെറിമ വ്യക്തമാക്കി. അന്വേഷണം നടത്തിയ സ്ഥിരീകരണം ഉണ്ടായാല്‍ മാത്രമേ പ്രതികരിക്കൂ എന്നാണ് സൈന്യം പറയുന്നത്. നൈജീരിയയില്‍ 2014ല്‍ സ്‌കൂള്‍ വിദ്യാര്‍ഥിനികളെ തട്ടിക്കൊണ്ടു പോയ സംഭവത്തോടെയാണു ബൊക്കോ ഹറാം കുപ്രസിദ്ധി നേടിയത്.
പ്രതികരിക്കാൻ ഇവിടെ എഴുതുക: