മാവേലിക്കര: മാനവരാശിക്കു ഭീഷണിയുയര്ത്തുന്ന യുദ്ധവും ഭീകരതയും അവസാനിപ്പിച്ചു സമാധാനം പുന:സ്ഥാപിക്കണമെന്നാവശ്യപ്പെട്ട് പീസ് ഫൗണ്ടേഷന്റെ നേതൃത്വത്തില് ഇസ്രായേല് – പാലസ്തീന് ഭരണത്തലവന്മാര്ക്ക് സമാധാന സന്ദേശവുമായി ഗാന്ധിപ്രതിമകള് അയച്ചു. പീസ് ഫൗണ്ടേഷന് ഓഫ് ഇന്ത്യ പ്രസിഡന്റും ഗാന്ധി പ്രചാരകനും ശില്പിയുമായ ഡോ. ബിജു ജോസഫും കുടുംബവുമാണ് സമാധാന സന്ദേശ പ്രചാരണത്തിന്റെ ഭാഗമായി ഗാന്ധി പ്രതിമകള് അയച്ചത്. സബര്മതിയിലെ മണ്ണും പ്രതിമയില് ആലേഖനം ചെയ്തിട്ടുണ്ട്.
ഇസ്രായേലില് മിസൈല് ആക്രമണത്തില് ഇടുക്കി സ്വദേശി സൗമ്യ സന്തോഷ് കൊല്ലപ്പെട്ടതിന്റെ പശ്ചാത്തലത്തിലാണ് സമാധാന സന്ദേശമുയര്ത്തി അഹിംസയുടെ പ്രവാചകനായ ഗാന്ധിജിയുടെ ഒരടി ഉയരമുള്ള പോളി മാര്ബിള് പ്രതിമകള് അയച്ചുകൊടുക്കാന് തീരുമാനിച്ചതെന്ന് ഡോ: ബിജു ജോസഫ് പറഞ്ഞു. സമാധാന സന്ദേശ പ്രചാരണത്തിന്റെ ഭാഗമായി രണ്ടായിരത്തിലധികം ചെറുതും വലുതുമായ ഗാന്ധി പ്രതിമകള് ഡോ: ബിജുവിന്റെ നേതൃത്വത്തില് ഇന്ത്യയിലും വിദേശത്തുമായി സ്ഥാപിച്ചിട്ടുണ്ട്.
ചിത്രം സമാധാന സന്ദേശ പ്രചാരണത്തിന്റെ ഭാഗമായി ഇസ്രായേല് – പാലസ്തീന് ഭരണത്തലവന്മാര് അയയ്ക്കുന്ന ഗാന്ധിപ്രതിമകള് പീസ് ഫൗണ്ടേഷന് ഓഫ് ഇന്ത്യ പ്രസിഡന്റ് ഡോ ബിജു ജോസഫ്, ഭാര്യ ജെമ ജോണ്, മകന് ഗാന്ധി ജോസഫ് ജോണ് എന്നിവര് ചേര്ന്ന് പായ്ക്ക് ചെയ്യുന്നു.
