കൊല്ലം : ശരീരം കാര്ന്നു തിന്നുകൊണ്ടിരുന്ന ക്യാന്സറിനെ സധൈര്യം നേരിട്ട് ജനങ്ങള്ക്ക് പ്രചോദനമായ നന്ദു മഹാദേവയെ മരണം കീഴടക്കി. കോഴിക്കോട് എംവിആര് കാന്സര് സെന്ററില് ചികിത്സയില് കഴിയവേ ഇന്ന് പുലര്ച്ചെ 3.30ഓടെയായിരുന്നു നന്ദുവിന്റെ മരണം. കോവിഡ് പശ്ചാത്തലത്തില് അവിടെ തന്നെ മൃതദേഹം സംസ്ക്കരിക്കാനാണ് ബന്ധുക്കളുടെ തീരുമാനം.
ശരീരത്തിന്റെ ഓരോ അവയവങ്ങളിലും ക്യാന്സര് പിടി മുറുക്കുമ്പോഴും തളരാതെ ആത്മവിശ്വാസത്തോടെ അതിനെ നേരിട്ട നന്ദു മലയാളികളുടെ ആതമവിശ്വാസം കൂടിയായിരുന്നു. തന്റെ ഫേസ്ബുക്ക് പോസ്റ്റുകളിലൂടെ ക്യാന്സര് രോഗികള്ക്ക് നല്കിയ പ്രചോദനം ചെറുതൊന്നുമല്ല.
കാന്സര് പോരാളികള്ക്കു മാത്രമല്ല, ജീവിതത്തില് തളര്ന്നിരിക്കുന്ന ഓരോരുത്തര്ക്കും ഓടിയോടി മുന്നോട്ടു കുതിക്കാനുള്ള ഊര്ജം നല്കുന്നതായിരുന്നു അദ്ദേഹത്തിന്റെ ഫേസ്ബുക്ക് കുറിപ്പുകള്.
അതിജീവനം എന്ന കൂട്ടായമയുടെ മുഖ്യ സംഘാടകന് കൂടിയായിരുന്നു നന്ദു. പല തവണ ക്യാന്സര് ഓരോ അവയവങ്ങളിലും പിടിമുറുക്കിയപ്പോള് അതിനെ ധൈര്യത്തോടെ നേരിടുകയും ഒന്ന് കൂടി ഊര്ജ്ജസ്വലനായി ജിവിതത്തിലേക്ക് നന്ദു തിരിച്ചു വരികയും ചെയ്തിരുന്നു. ജീവിതത്തില് പ്രതിസന്ധികള് പലതുണ്ടാകും ഒരുഘട്ടത്തിലും തോറ്റ് പോവരുതെന്നായിരുന്നു നന്ദു എന്നും പറഞ്ഞിരുന്നത്.
