തിരുവനന്തപുരം : കോവിഡ് രണ്ടാം തരംഗത്തില്‍ സംസ്ഥാനത്തെ രോഗവ്യാപനം നിയന്ത്രണ വിധേയമായിട്ടില്ല. ചില ജില്ലകളില്‍ രോഗവ്യാപനം രൂക്ഷമാണെന്നും ആരോഗ്യ വകുപ്പ് മന്ത്രി കെ.കെ. ശൈലജ. ഓക്‌സിജന്‍ ക്ഷാമത്താല്‍ സംസ്ഥാനത്ത് മരണം സംഭവിക്കാതിരിക്കുന്നതിനായി ആരോഗ്യ വകുപ്പ് നടപടികളും ആരംഭിച്ചതായും അവര്‍ അറിയിച്ചു.
രോഗികളുടെ എണ്ണം വര്‍ധിച്ചതോടെ സംസ്ഥാനത്ത് ഐസിയു കിടക്കകള്‍ നിറഞ്ഞുകൊണ്ടിരിക്കുന്ന സാഹചര്യമാണ്. ഇത് പരിഹരിക്കുന്നതിനായി ഐസിയു ബെഡുകളുടെ എണ്ണം വര്‍ധിപ്പിക്കുന്നതിനുള്ള നടപടികളും ആരംഭിച്ചു കഴിഞ്ഞിട്ടുണ്ട്. രോഗികളുടെ എണ്ണം പ്രതിദിനം വര്‍ധിക്കാന്‍ തുടങ്ങിയതോടെ ഓക്‌സിജന്‍ ക്ഷാമം ഇല്ലാതാക്കുന്നതിന് വേണ്ടിയുള്ള നടപടികള്‍ക്കും തുടക്കമായിട്ടുണ്ട്.
കേന്ദ്രസര്‍ക്കാരിന്റെ ഓക്‌സിജന്‍ കോട്ട കൂടി ലഭിച്ചാല്‍ സംസ്ഥാനത്തിന്റെ ആവശ്യങ്ങള്‍ പരിഹരിക്കാന്‍ സാധിക്കും. കാസര്‍കോഡ് ഓക്‌സിജന്‍ ക്ഷാമം റിപ്പോര്‍ട്ട് ചെയ്തിരുന്നെങ്കിലും ഇത് താത്കാലികമായി പരിഹരിക്കാന്‍ സാധിച്ചിട്ടുണ്ട്. എന്നാല്‍ വിവിധ ജില്ലകളിലേക്ക് ഓക്‌സിജന്‍ കൊണ്ടുപോകുന്നതിനായി ട്രക്കുകളുടെ അഭാവമുണ്ട്. അതിനാല്‍ കേന്ദ്ര സര്‍ക്കാരിനോട് ട്രക്കുകള്‍ നല്‍കാനും ആവശ്യപ്പെട്ടിട്ടുണ്ട്.
അതേസമയം സംസ്ഥാനത്തെ കോവിഡ് മരണ നിരക്ക് കുറച്ചുകാണിക്കുന്നെന്ന ആരോപണം തെറ്റാണെന്നും മന്ത്രി അറിയിച്ചു. എല്ലാ തദ്ദേശ സ്വയംഭരണ സ്ഥാപനങ്ങളും ഇതുസംബന്ധിച്ച് കൃത്യമായി രജിസ്റ്റര്‍ ചെയ്യുന്നുണ്ട്. റിപ്പോര്‍ട്ട് പുറത്തുവന്നില്‍ തെറ്റുണ്ടെന്നും അവര്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: