തിരുവനന്തപുരം: കോവിഡ് പ്രതിരോധ പ്രവര്ത്തനങ്ങള്ക്കിടെ കേരളത്തില് മരണമടഞ്ഞ രണ്ട് ആരോഗ്യ പ്രവര്ത്തകരുടെ കുടുംബത്തിന് 50 ലക്ഷം രൂപയുടെ വീതം ഇന്ഷുറന്സ് ക്ലെയിം ലഭിച്ചു. എറണാകുളം ലിറ്റില് ഫഌര് ആശുപത്രിയിലെ അനസ്തീഷോളജിസ്റ്റ് ഡോ. ടി.വി. ജോയ്, കോട്ടയം മെഡിക്കല് കോളേജിലെ ബ്ലഡ് ബാങ്ക് ടെക്നീഷ്യന് ജി. സോമരാജന് എന്നിവരുടെ കുടുംബത്തിനാണ് ഇന്ഷുറന്സ് അനുവദിച്ചത്. പ്രധാനമന്ത്രി ഗരീബ് കല്ല്യാണ് പാക്കേജില് നിന്നാണ് തുക അനുവദിച്ചിരിക്കുന്നത്.
ഡോ. ടിവി. ജോയ് 30 വര്ഷമായി സേവനമനുഷ്ഠിച്ചു വരികയായിരുന്നു. ജില്ലാ മെഡിക്കല് ഓഫീസറുടെ കീഴില് ലിറ്റില് ഫഌര് ആശുപത്രിയെ എംപാനല് ചെയ്തതു മുതല് ക്രിട്ടിക്കല് കെയര് ടീമില് പ്രധാന പങ്ക് വഹിച്ചു. രോഗികളുടെ വെന്റിലേറ്റര് പരിചരണത്തിലും ഡോ. ടിവി. ജോയ് സേവനമനുഷ്ഠിച്ചിട്ടുണ്ട്.
22 വര്ഷം ആരോഗ്യ മേഖലയില് സേവനമനുഷ്ഠിച്ചയാളാണ് ജി. സോമരാജന്. കോവിഡ് രോഗികളുടെ പരിചരണത്തിന്റെ ഭാഗമായുള്ള രക്ത പരിശോധന പോലെ അതീവ റിസ്കുള്ള മേഖലയിലായിരുന്നു ജോലി ചെയ്തിരുന്നത്. അദ്ദേഹത്തിന്റെ ഭാര്യ ഡെയ്സമ്മ കോട്ടയം മെഡിക്കല് കോളേജിലെ ഹെഡ് നഴ്സാണ്. ഡെയ്സമ്മ ഇപ്പോഴും കോവിഡ് ഡ്യൂട്ടിയിലാണ്.
